Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 532 Hüküm no: 559 Orijinal metin no: [139a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çolak Ahmed oğlu İsmail’in babasının cariyesi olduğunu iddia ettiği Safiye’nin önceden azat edilmiş olduğu Mahmiye-i İstanbul’da Kâtib Şemseddin mahâllesinde sâkin iken bundan akdem fevt olan Çolak Ahmed Ağa b. Ali b. Mustafa’nın vârisi zevce-i menkûha-i metrûkesi Rukıye Hanım bt. İbrahim Paşa ile sulbî kebîr oğlu İsmail Ağa ve sulbiye kebîre kızları Âişe ve Havva’ya münhasıra olduğu şer‘an zâhir ve müte‘ayyin oldukdan sonra mezbûr İsmail Ağa mahmiye-i mezbûrda meclis-i şer‘-i hatîrde müteveffâ-yı mezbûr Çolak Ahmed Ağa’ya rıkk-ı sâbıkını mu‘terife olan orta boylu açık kaşlı elâ gözlü Nemçetiyyü’l-asl Müslimetü’l-mille bâ‘isetü hâzihi’l-vesîka Safiye bt. Abdullah muvâcehesinde üzerine da‘vâ ve takrîr-i kelâm edip mevsûfe-i mezbûre Safiye babam müteveffâ-yı mezbûrun câriye-i memlûkesi olup ba‘de-vefâtihî bi’l-irsi’ş-şer‘î bana ve sâir verese-i mezkûresine isâbet ve intikāl etmiş iken hâlâ mevsûfe-i mezbûre bize rıkka inkıyâdından imtinâ‘ eder suâl olunsun dedikde gıbbe’s-suâl mevsûfe-i mezbûre Safiye cevâbında fi’l-hakīka müteveffâ-yı mezbûrun câriye-i memlûkesi olduğunu ikrâr lâkin müteveffâ-yı mezbûr Ahmed Ağa hayâtında fevtinden on sene mukaddem beni tahrîr ve i‘tâk ve zümre-i harâyir-i asliyât silkine idrâc ve ilhâk edip hattâ fevtinden sekiz sene mukaddem zevc-i evvelim Mehmed Çavuş’un taht-ı nikâhında olduğum hâlde mahzar-ı Müslimînden ber-vech-i muharrer beni i‘tâk eylediğini müteveffâ-yı mezbûr Ahmed Ağa ikrâr ve işhâd dahi etmişdir deyü def‘le mukābele edicek gıbbe’l-istintâk ve’l-inkâr mevsûfe-i mezbûrdan def‘-i mezkûruna beyyine taleb olundukda udûl-i Müslimînden ve mevsûfe-i mezbûrenin zâtını ma‘rifet-i şer‘iyye ile ârifân olup mahmiye-i mezbûrda Üskübî mahâllesi ahâlîsinden Mehmed Efendi b. Mustafa ve Veli Bey b. Ahmed nâm kimesneler li-ecli’ş-şehâde meclis-i şer‘e hâzırân olup istişhâd olunduklarında fi’l-hakīka müteveffâ-yı mezbûr Çolak Ahmed Ağa b. Ali b. Mustafa hayâtında câriye-i memlûkesi işbu mevsûfe-i mezbûre Safiye zevc-i evveli Mehmed Çavuş’un taht-ı nikâhında iken fevtinden sekiz sene mukaddem mevsûfe-i mezbûreyi ol târîhden iki sene mukaddem tahrîr ve i‘tâk ve zümre-i asliyât silkine idrâc ve ilhâk eylediğini bizim huzûrumuzda ikrâr ve bizi işhâd eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye eylediklerinde gıbbe’t-ta‘dîl ve’t-tezkiye şehâdetleri makbûle olmağın mûcibince mevsûfe-i mezbûre Safiye’nin hürriyetine ba‘de’l-hükm mezbûr İsmail Ağa bî-vech mu‘ârazadan men‘ olunup mâ-vaka‘a bi’t-taleb ketb olundu. Fi’l-yevmi’s-sâbi‘ min-Şa‘bâni’l-mu‘azzam li-sene sitte aşere ve mi’e ve elf. Şuhûdü’l-hâl: el-Hâc Mustafa b. Ömer, Mehmed Ağa b. Ali, Mehmed Çelebi b. Receb ve gayruhum mine’l-huzzâr.