Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 531 Hüküm no: 558 Orijinal metin no: [138b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Müteveffa Hezargrad muvakkiti Yakub Efendi’nin Rumeli Kazaskeri muhzırlarından Sandıkçı Hasan Çelebi’ye vermiş olduğu borcun tahsil edilmesi Mahrûse-i Edirne ahâlîsinden ve Rumeli kazâsından olup Hezargrad muvakkiti iken bundan akdem fevt olan Yakub Efendi b. Mustafa’nın verâseti zevce-i menkûha-i metrûkesi el-Hacce Âişe Hatun bt. el-Hâc Yusuf ile sulbî kebîr oğlu Yahya Efendi’ye münhasıra ve mesele-i mirâsı dört sehmden olup sihâm-ı mezbûrenin bir sehmi mezbûre el-Hacce Âişe Hatun’a ve üç sehmi mezbûr Yahya Efendi’ye isâbeti tahakkukundan sonra mezbûr Yahya Efendi tarafından meblağ-ı âti’l-beyandan hisse-i ırsiyelerini ahz u kabzına ve kendüye îsâle ve ahz u kabz ve îsâle mutavakkıf olduğu umûrun küllîsine vekîl olduğu Hüseyin Bey b. Abdullah ve Ahmed Bey b. Mehmed şehâdetleriyle şer‘an sâbit olan Halil Ağa b. el-Hâc Arslan mahmiye-i İstanbul’da meclis-i şer‘de ve Rumeli Kādıaskeri muhzırlarından Sandıkcı Hasan Çelebi b. Şaban mahzarında bi’l-vekâle ikrâr-ı tam ve takrîr-i kelâm edip müteveffâ-yı mezbûr Yakub Efendi’ye hayâtında Herazgrad kazâsı tevcîh oldukda mu‘tâd-ı kadîm üzere kazâ-i mezbûrun müjdesi için mezbûr Hasan Çelebi’ye yüz guruş bey‘ ve teslîm etdikden sonra mezbûr Yakub Efendi fevt olup kazâ-i mezbûrûn zabtı müyesser olmamağla mezbûr Hasan Çelebi makbûzu olup hâlâ a‘yânı yedinde mevcûd olan meblağ-ı mezbûr yüz guruşdan müvekkil-i mezbûr Yahya Efendi’nin seksen yedi buçuk guruş hisse-i ırsiyesi mukābelesinde bana iki aded kem ayar on sekiz aded eşrefî altını ve kırk iki buçukluk tuğrâlı altın def‘ ve teslîm edip ben dahi yedinden ahz u kabz eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 6 min-Şa‘bâni’l-mu‘azzam sene 1116. [139a] Şuhûdü’l-hâl: Ali Efendi b. Ahmed, el-Hâc Mehmed Efendi b. Ahmed, İsmail Efendi el-kādı, Ömer Efendi el-kādı, Veli Efendi el-kādı, Mehmed Efendi el-kādı, Mustafa Efendi el-kādı, İbrahim b. Himmet.