Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 534 Hüküm no: 562 Orijinal metin no: [139b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Çavuş’un varislerinden olan yeğeninin payına düşen miras hakkını diğer varislerden tamamen aldığı Mahmiye-i İstanbul’da Kızılminâre mahâllesinde sâkin iken bundan [akdem] fevt olan Ali Çavuş b. İvaz’ın verâseti zevce-i menkûha-i metrûkesi Mümine Hatun bt. es-Seyyid Süleyman ile kebîre kızı Rukıye nâm hatuna ve sagīre kızı Hadîce’ye ve li-ebeveyn karındaşı oğlu İbrahim ibn-i Hasan nâm kimesneye münhasıra ve mesele-i mirâsı yirmi dört sehmden olup sihâm-ı mezbûrenin üç sehmi mezbûre Mümine Hatun’a ve sekizer sehmi mezbûretân Rukıye ve Hadîce’den her birine ve beş sehmi mezbûr İbrahim’e isâbeti tahakkukundan sonra mezbûr İbrahim [140a] mahmiye-i mezbûrede meclis-i şer‘de ve sagīre-i mezbûre Hadîce’nin vâlidesi ve tesviye-i umûruna kıbel-i şer‘den mansûbe vasîsi olmağla tereke-i müteveffâ-yı mezbûra bi’l-verâse ve bi’l-vesâyâ vâzı‘atü’l-yed olan râfi‘atü’l-vesîka mezbûre Mümine Hatunun tarafından husûs-ı âti’l-beyana vekîl-i şer‘îsi karındaşı es-Seyyid Halil b. el-mezbûr es-Seyyid Süleyman mahzarında ikrâr-ı tam ve takrîr-i kelâm edip mûrisim müteveffâ-yı mezbûr Ali Çavuş’un terekesi ma‘rifet-i şer‘le tahrîr olundukda zimem-i nâsda olan hukūkundan mâ‘adâ cemi‘ emlâk ü urûz ve evânî-i nühâsiye ve gayri nühâsiyeden ber-mûceb-i defter-i kassâm tashîh-i mezkûr üzere bana isâbet eden beş sehim hisse-i ırsiye-i şer‘iyyemi mezbûre Mümine Hatun yedinden tamamen ahz u kabz edip müteveffâ-yı mezbûrun zimem-i nâsda olan hukūkundan mâ‘adâ terekesinden bana âide beş sehim hisse-i ırsiyeme müte‘allıka âmme-i da‘vâ ve kâffe-i mutâlebâtdan mezbûre Mümine Hatun ile sagīre-i merkūmenin zimmetlerini ibrâ ve iskāt eyledim dedikde gıbbe’t-tasdîkı’ş-şer‘ı mâ-vaka‘a bi’t-taleb ketb olundu. Fi’l-yevmi’s-sâmin min-Şa‘bâni’l-mu‘azzam li-sene sitte aşere ve mi’e ve elf. Şuhûdü’l-hâl: el-Hâc İbrahim bin Ahmed, el-Hâc Ali bin Ahmed, Osman Çelebi b. Mahmud, el-Hâc Mustafa Efendi b. Süleyman Efendi, İbrahim bin Receb, Mısırlı el-Hâc Mehmed b. Mustafa, es-Seyyid Halil b. İbrahim.