Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 535 Hüküm no: 563 Orijinal metin no: [140a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Halep ahalisinden Ellez’in Kasapbaşı Mehmed Ağa’ya poliçe yoluyla verdiği para davasından vazgeçmesi Bâ-imzâ-i hazret-i Veliyyü’n-ni‘am. Fi’l-asl medîne-i Halebü’ş-şehbâ ahâlîsinden olup hâlâ mahmiye-i İstanbul’da Vâlide Hanı’nda misâfiren sâkin Ellez v. Mihail nâm zimmî mahmiye-i mezbûrede meclis-i şer‘de işbu râfi‘ü’l-kitâb Samurkaş Mehmed Ağa b. İsmail nâm kimesne mahzarında ikrâr ve takrîr-i kelâm edip bundan akdem ben medîne-i mezbûrda sâkin Salamon ve Haron nâm Yahûdîlerin emirleriyle poliçe tarîkiyle oğlum hâzır bi’l-meclis Şahin yediyle sâbıkā Kasabbaşı olan Mehmed Ağa b. İskender’e bin altı yüz guruş def‘ ü teslîm ol dahi ber-vech-i muharrer ahz u kabz eyledikden sonra meblağ-ı mezbûrun beş yüz guruşunu mukaddemâ mezbûrân Yahûdîlerden ahz u kabz edip bin yüz guruşu bâkī kalıp lâkin mezbûr Samurkaş Mehmed Ağa poliçe esnâsında medîne-i mezbûrda olmağla zikirleri mürûr eden poliçe akçesi merkūm Samurkaş Mehmed Ağa’nın emriyle olmuş idi deyü meblağ-ı bâkī-i mezbûru merkūm Samurkaş Mehmed Ağa’dan taleb ve da‘vâ sadedinde olmuşdum el-hâletü hâzihi vech-i muharrer üzere da‘vâ-i mezkûrumda ben mübtıl olmağla da‘vâ-i mezkûrumdan fâriğ olup husûs-ı mezkûra müte‘allıka âmme-i da‘vâ ve kâffe-i mutâlebâtdan merkūmân Kasabbaşı Mehmed Ağa ve Samurkaş Mehmed Ağa’dan her birinin zimmetini ibrâ-i âmm-ı kātı‘ü’n-nizâ‘la ibrâ ve iskāt eyledim dedikde gıbbe’t-tasdîkı’ş-şer‘î mezbûr Şahin meclis-i şer‘de merkūm Samurkaş Mehmed Ağa mahzarında ikrâr ve takrîr-i kelâm edip vech-i meşrûh üzere benim merkūm Kasabbaşı Mehmed Ağa’ya medfû‘um olan meblağ-ı mezbûr bin altı yüz guruş babam merkūm Ellez’in malı olup benim kat‘â alâka ve medhalim olmamağla meblağ-ı mezbûra müte‘allıka cemî‘ da‘vâdan ben dahi merkūmân Kasabbaşı Mehmed Ağa ve Samurkaş Mehmed Ağa’dan her birinin zimmetini ibrâ-i âmm-ı kātı‘ü’n-nizâ‘la ibrâ ve iskāt eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb [olundu.] Fi’l-yevmi’s-sâmin min-Şa‘bâni’l-mu‘azzam li-sene sitte aşere ve mi’e ve elf. Şuhûdü’l-hâl: Süleyman Ağa b. Ebubekir, Mehmed Çelebi b. ( ), Ali Bey b. Abdullah, Ahmed Bey b. Mehmed.