Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 542 Hüküm no: 570 Orijinal metin no: [142b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şarköy’e tâbi Hora Karyesi gayrimüslimlerinin, köy zabitinden razı oldukları ve üzerinde hakları bulunmadığı Vilâyet-i Rumeli’nde Gelibolu kazâsı muzâfâtından Şehirköy [Şarköy] nâhiyesine tabi Hora nâm karye ahâlîsinden Tanaş v. Yani ve Papa Dimitraki v. Arkondi ve Papa Aleksi v. Drana ve İstoyo v. Yanaki ve Dimitraki v. Tanaş ve diğer Dimitraki v. Ramago ve Aleksi v. Yorgaki ve Esterati v. Tanaş ve Yorgi v. Harismal ve Dimitraki v. Todori ve Papa Yamandi v. Yaraki ve Esterati v. Snadino ve Hıristodoli v. Jaşti ve Yorgaki v. Kostantin ve Yanaki v. Rali nâm zimmiler mahmiye-i mezbûrede meclis-i şer‘-i hatîr-i lâzımü’t-tevkīrde sâbıkā karye-i mezbûre zâbiti olan işbu râfi‘ü’l-vesîka Ali Ağa b. Mehmed mahzarında her biri ikrâr ve takrîr-i kelâm edip işbu mezbûr Ali Ağa karye-i merkūmede altı sene zâbit olup sinîn-i merkūmede a‘şâr-ı şer‘iyye ve rüsûm-ı örfiyemizi ber-mûcib-i defter-i sultânî cem‘ ve tahsîl edip emir ve defterinden ziyâde bi-gayrı hakkın bir akçe ve bir habbe almayıp her birimiz kendinden râzı ve şâkir olup üzerinde hukūk-ı şer‘iyyeden aslâ hakkımız olmamağla târîh-i kitâba gelince beynimizde cereyân eden ahz u i‘tâ ve mu‘âmelât-ı şettâ ve sâir hukūk-ı ma‘lûme ve mechûleye müte‘allıka âmme-i da‘vâdan her birimiz mezbûr Ali Ağa’nın zimmetini ibrâ ve iskāt eyledik, dediklerinde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-hâdi aşere min-Şa‘bâni’l-mu‘azzam li-sene sitte aşere ve mi’e ve elf. Şuhûdü’l-hâl: Mustafa Ağa b. Hüseyin el-mübâşir, Ali Bey b. Yusuf, Abdullah Ağa b. İbrahim, Ali Çelebi b. İbrahim, Abdurrahman Beşe b. Osman, Mahmud Ağa b. Halil, İsmail Ağa b. ( ).