Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 540 Hüküm no: 569 Orijinal metin no: [142a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Mustafa Ağa’nın iki zevcesinden biri olan Fatıma ile diğer zevcesinden kızı Ümmihani arasında miras meselesi Mahmiye-i İstanbul’da Hara[ccı] Yunus mahâllesi ahâlîsinden iken bundan akdem fevt olan Mustafa Ağa b. Ahmed b. Hamza’nın verâseti zevcetân-ı metruketânı Fâtıma ve Ümmihani bt. Abdullah nâm hatunlar ile sulbiye-i kebîre kızı diğer Ümmihani Hatun’a münhasıra ve mesele-i mîrâsı on altı sehmden olup sihâm-ı mezbûrenin birer sehmi zevcetân-ı mezbûretân Fâtıma Hatun ve Ümmihani Hatun’dan her birine ve on dört sehmi farzan ve redden mezbûre diğer Ümmihani’ye isâbeti tahakkukundan sonra mezbûre Fâtıma Hatun mahmiye-i mezbûrede meclis-i şer‘de menzi[l]-i âti’l-beyana vâzı‘atü’l-yed olan râfi‘atü hâzihi’l-vesîka mezbûre ve diğer Ümmihani mahzarında üzerine da‘vâ ve takrîr-i kelâm edip zevcim müteveffâ-yı mezbûrun terekesinden olup mahmiye-i mezbûrede İbrahim Çavuş Mahâllesi’nde vâki‘ bir tarafdan Sarâyî Ümmihani nâm hatun mülkü ve bir tarafdan ba‘zan Havva Hatun mülkü ve ba‘zan mescid-i şerîf cidârı ve ba‘zan tarîk-i âm ve bir tarafdan tarîk-i hâs ve bir tarafdan tarîk-i âm ile mahdûd iki bâb fevkānî oda ve bir tahta-pûş ve iki bâb tahtânî oda ve zât-ı eşcâr-ı müsmire ve gayr-ı müsmire hadîka ve iki su kuyusu ve yine iki bâb tahtânî oda ve üç kenîf ve iki sokak kapısını müştemil menzilini işbu mezbûre diğer Ümmihani Hatun müstakillen zabt edip tashîh-i mezkûre bana isâbet eden bir sehim hisse-i ırsiyemi tasarrufdan beni men‘ eder suâl olunup menzil-i mahdûd-ı mezbûrda olan bir sehim hisse-i ırsiyemden kasr-ı yedine tenbîh olunmak matlûbumdur, dedikde gıbbe’s-suâl mezbûre diğer Ümmihani Hatun cevâbında fi’l-vâki‘ menzil-i mahdûd-ı mezbûra ber-vech-i muharrer vaz‘-ı yedini ikrâr lâkin babam müteveffâ-yı mezbûr Mustafa Ağa hâl-i hayât ve kemâl-i akl[ü] sıhhatde menzil-i mahdûd-ı mezbûru cemî‘ tevâbi‘ ve levâhıkı ve hukūk ve merâfıkı ile bana dört yüz kıt‘a Esedî guruşa bey‘ ü temlîk ve teslîm ben dahi ber-vech-i muharrer iştirâ ve temellük ve kabz ve kabûl eylediğimden semen-i mezbûr ve dört yüz guruşun iki yüz yetmiş guruşunu yedimden ahz u kabz ve bâkī yüz otuz guruş mutâlebesinden zimmetimi ibrâ ve iskāt edip hattâ menzil-î mahdûd-ı mezbûru ber-vech-i muharrer bana bey‘ ü teslîm ve semen-i mezbûrun iki yüz yetmiş guruşunu yedimden ahz u kabz ve bâkī yüz otuz guruş mutâlebesinden zimmetini ibrâ ve iskāt eylediğini kezâlik hâl-i hayât ve kemâl-i sıhhatinde bin yüz on beş senesi Recebinin onuncu günü mahmiye-i mezbûrede Davudpaşa mahkemesinde nâibü’ş-şer olan fahrü’l-müderrisîni’l-kirâm Zülâlî Hasan Efendi huzûrunda ikrâr ve i‘tirâf edip mûcibince yedime kıbel-i şer‘den hüccet-i şer‘iyye dahi vermiş idi deyü def‘le mukābele ve mazmûnu takrîrine mutâbık ve mevlânâ-yı müşârün-ileyhin imzâ ve hatemini hâviye ve târîh-i mezbûr ile müverreha bir kıt‘a hüccet ibrâz etdikde gıbbe’l-istintâk mezbûre Fâtıma Hatun mazmûn-ı hücceti bi’l-külliye inkâr etmeğin mezbûre diğer Ümmihani Hatun’dan mazmûn-ı hüccete mutâbık beyyine talep olundukda mahâlle-i mezbûre ahâlîsinden olup zeyl-i huccetde isimleri mastûr olan Mehmed Çelebi b. Halil ve Hasan Çelebi b. İbrahim li-ecli’ş-şehâde meclis-i şer‘e hâzırân olup fi’l-vâki‘ müteveffâ-yı mezbûr Mustafa Ağa b. Ahmed b. Hamza mahmiye-i mezbûrede İbrahim Çavuş mahâllesinde vâki‘ bir tarafdan Sarâyî Ümmihani nâm hatun mülkü ve bir tarafdan ba‘zan Havva Hatun mülkü ve bir tarafdan mescid-i şerîf cidârı ve ba‘zan tarîk-i âm ve bir tarafdan tarîk-i hâs ve bir tarafdan tarîk-i âm ile mahdûd iki bâb fevkānî oda ve bir tahta-pûş ve iki tahtânî oda ve zât eşcâr-ı müsmire ve gayr-ı müsmire hadîka ve iki su kuyusu ve yine iki tahtânî oda ve üç kenîf ve iki sokak kapısını müştemil mülk menzilini cemî tevâbi‘ ve levâhıkı ve hukūk ve merâfık ile kızı iş bu mezbûre diğer Ümmihani Hatun’a dört yüz kıt‘a esedî guruşa bey‘ ü temlîk ve teslîm ol dahi iştirâ ve temellük ve kabz ve kabûl eylediğinden sonra semen-i mezbûr dört yüz guruşun iki yüz yetmiş guruşunu yedinden ahz u kabz edip bâkī yüz otuz [142b] guruş mutâlebesinden zimmetini ibrâ ve iskāt eylediğini bin yüz on beş senesi Recebi’nin onuncu günü mahmiye-i mezbûrede Davudpaşa Mahkemesinde nâibü’ş-şer olan Zülâlî Hasan Efendi huzûrunda hâl-i hayât ve kemâl-i akl ü sıhhatde ikrâr ve i‘tirâf edip mûcibince mezbûre diğer Ümmihani Hatun yedine kıbel-i şer‘den iş bu hüccet-i şer‘iyye verildi biz hüccet-i mezbûrenin mazmûnuna bu vech üzere şâhidleriz, şehâdet dahi ederiz deyü her birisi edâ-i şehâdet-i şer‘iyye etdikde ba‘de’t-ta‘dîl ve’t-tezkiye şehâdetleri makbûle olmağın mûcibince ba‘de’l-hükm müdde‘iye-i mezbûre Fâtıma Hatun bî-vech mu‘ârazadan men‘ olunup mâ-vaka‘a bi’t-taleb ketb olundu. Fi’l-âşir min-Şa‘bâni’l-mu‘azzam li-sene sitte aşer ve mi’e ve elf. Şuhûdü’l-hâl: es-Seyyid Abdullah Çelebi b. Halil, Ali Çelebi b. Ramazan, Musa Bey b. Ali, Süleyman Çelebi b. İbrahim, Ali Efendi b. Ahmed , Mehmed Efendi b. Ahmed , İsmail Efendi el-kādı.