Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 543 Hüküm no: 572 Orijinal metin no: [143a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kethüda Kara Mehmed Ağa’nın, müteveffa Basra Valisi Aşçızade Mehmed Paşa’nın kendisine teslim ettiği parayı varislerine iade etmeyi taahhüt etmesi Bâ-imzâ-i Hazreti veliyyü’n-ni‘am. Mahrûse-i Galata’ya tâbi‘ kasaba-i Kasımpaşa’da Sirkeci mahâllesi sükkânından olup bundan akdem Basra Vâlisi iken vedâ‘-ı âlem-i fânî eden Aşcızâde Mehmed Paşa b. Ahmed b. Abdullah’ın verâseti sulbî sagīr oğulları Mehmed Bey ve İbrahim Bey’e münhasıra olduğu lede’ş-şer‘ zâhir ve müte‘ayyin oldukdan sonra merhûm-ı mezbûrun li-ebeveyn kız karındaşı oğlu ve sagīrân-ı mezbûrânın tesviye-i emrlerine vasiyy-i muhtârları olup hâlâ zikri mürûr eden Basra’da misâfiren sâkin Mehmed Bey b. Ali b. Mustafa tarafından husûs-ı âti’l-beyana vekîl olduğu yedinde olup mazmûnu ve zeylinde mastûrü’l-ism olan mahâlle-i mezbûre sükkânından Mehmed Çelebi b. Veli Efendi ve Hüseyin Çelebi b. Mustafa şehâdetleriyle hasm-ı câhid-i câ’i’z-zikr muvâcehesinde şer‘an müsbet olan isbât-ı vekâlet hücceti nâtıka olduğu üzere şer‘an sâbit ve sübût-ı vekâletine hükm-i şer‘î lâhık olan işbu râfi‘ü’l-vesîka mahâlle-i mezbûr imamı Ahmed Efendi b. eş-Şeyh Veliyüddin Efendi nâm kimesne mahmiye-i İstanbul’da meclis-i şer‘de merhûm-ı mezbûr Mehmed Paşa’nın hayâtında salyâne kethüdâsı olan Kara Mehmed Ağa b. Ali nâm kimesne mahzarında üzerine da‘vâ ve takrîr-i kelâm edip merhûm-ı mezbûrûn hayâtında ev kethüdâsı olan işbu hâzır-bi’l-meclis Ebubekir Efendi b. Mahmud merkūm-ı mezbûrun hayâtında emriyle ba‘zı mahâllere isâl ve teslîm etmek üzere merkūm-ı mezbûrûn malı olup yedinde makbûzu olan malından mezbûr Kara Mehmed Ağa’ya bi’d-defa‘ât on altı bin iki yüz kırk beş guruş def‘ ü teslîm ol dahi ber-vech-i muharrer ba‘de’l-ahz meblağ-ı mezbûru emr ü ta‘yîn eylediği mahâllere teslîm etmeyip kendi masârıfına sarfla istihlâk edip meblağ-ı mezbûru kable’l-ahz mezbûr Mehmed Paşa fevt olup meblağ-ı mezbûr ırsen ber-vech-i muharrer hasran vârisleri olan sagīrân-ı mezbûrâna isâbet ve intikāl edip mezbûr Kara Mehmed Ağa merhûm-ı mezbûrun vefâtından sonra ve târîh-i kitâb senesi Muharreminin on birinci günü merhûm-ı mezbûrun mahâlle-i mezbûrda vâki‘ menzilinde huzûr-ı Müslimînde merhûm-ı mezbûr Aşcızâde Mehmed Paşa’nın malı olup hâne kethüdâsı olan mezbûr Ebubekir Efendi yedinden minvâl-i meşrûh üzere ahz u kabz eylediğim on altı bin iki yüz kırk beş guruşu ben merhûm-ı mezbûrun emr ü ta‘yîn eylediği mahâllere teslîm etmeyip kendi masârıfıma sarfla istihlâk etmekle meblağ-ı mezbûr on altı bin iki yüz kırk beş guruş hasran vârisleri olan sulbî sagīr oğulları mezbûrâna bi-tarîkı’d-damân el-an zimmetimde vâcibü’l-ed[â] ve lâzimü’l-kazâ deynimdir, deyü şuhûd mahzarında ikrâr ve işhâd dahi etmiş iken hâlâ meblağ-ı mezbûru bi’l-vekâle mezbûr Kara Mehmed Ağa’dan taleb eylediğimde bana teslîmden imtinâ‘ eder, suâl olunsun dedikde gıbbe’s-suâl ve akībe’l-inkâr vekîl-i mezbûrdan [143b] müdde‘âsına mutâbıka beyyine taleb olundukda udûl-i ahrâr-ı ricâl-i Müslimînden ve kasaba-i mezbûrda Kurt Çelebi mahâllesinde sâkin Müezzin Ali Halîfe b. Veli ve Hüseyin Çelebi b. Mustafa ve Ahmed Kapudan b. Veli ve Mehmed Ağa b. Canib Ahmed Efendi ve Mehmed Kapudan b. Ali ve Mehmed Çelebi b. Veli nâm kimesneler li-ecli’ş-şehâde meclis-i şer‘e hâzirûn olup isre’l-istişhâd fi’l-vâki‘ işbu mezbûr Kara Mehmed Ağa merhûm-ı mezbûr Aşcızâde Mehmed Paşa’nın vefâtından sonra ve târîh-i kitâb senesi Muharreminin on birinci günü merhûm-ı mezbûrûn mahâlle-i mezbûrda vâki‘ menzilinde merhûm-ı mezbûr Aşcızâde Mehmed Paşa’nın malı olup hâne kethüdâsı olan hâzır-bi’l-meclis mezbûr Ebubekir Efendi yedinden minvâl-i meşrûh üzere merhûm-ı mezbûrun emriyle ahz u kabz eylediğim on altı bin iki yüz kırk beş guruşu ben merhûm-ı mezbûrun emr ü ta‘yîn eylediği mahâllere teslîm etmeyip kendi masârıfıma sarfla istihlâk etmekle meblağ-ı mezbûr on altı bin iki yüz kırk beş guruşu ber-vech-i muharrer hasran vârisleri olan sagīrân-ı mezbûrâna bi-tarîkı’d-damân el-an zimmetimde vâcibü’l-edâ ve lâzimü’l-kazâ deynimdir deyü bizim huzûrumuzda ikrâr ve i‘tirâf edip bizi işhâd eyledi biz bu husûsa bu vech üzere şâhidleriz, şehâdet dahi ederiz deyü her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcibiyle ba‘de’l-hükm ve’t-tenbîh mâ-vaka‘a bi’t-taleb ketb olundu. Fi’l-yevmi’s-sâdis min-Şa‘bâni’l-mu‘azzam li-sene sitte aşere ve mi’e ve elf. Şuhûdü’l-hâl: Cerrâh el-Hâc Sinan b. ( ), Musa Kapudan b. ( ), Ayntablı Musa Kapudan b. ( ), Mustafa Kapudan Ayntablı, Mustafa Kapudan Ayntablı, Sofu Mehmed Kapudan, Mahmud Ağa b. Ahmed, Arnavud Mustafa Çelebi b. ( ), Eşmenzâde Mustafa Çelebi, İbrahim Efendi Dîvân efendisi, İsmail Çelebi b. Mehmed, Mehmed Bey attâr, es-Seyyid İsmail b. Ahmed.