Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 545 Hüküm no: 573 Orijinal metin no: [143b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Çelebi’nin Hasan Çelebi zimmetinde olan kereste bedelini ödemesi Keresteci tâifesinden iş bu râfi‘ü’l-vesîka Mustafa Çelebi b. İbrahim mahmiye-i İstanbul’da meclis-i şer‘de Hasan Çelebi b. Hüseyin mahzarında üzerine da‘vâ ve takrîr-i kelâm edip işbu yedimde olan deyn temessükü mantûkunca mezbûr Hasan Çelebi zimmetinde yedimden iştirâ ve kabz eylediği nev‘ ve cinsi beynimizde ma‘lûm kereste semeninden yüz kırk yedi guruş ve bir zolata hakkım olup meblağ-ı mezbûrun kırk üç guruşunu yedinden ahz u istîfâ edip yüz dört guruş bir zolatası zimmetinde bâkī kalmağla meblağ-ı bâkī-i mezbûru talep eylediğimde edâdan imtinâ‘ eder, suâl olunup alıverilmek matlûbumdur dedikde gıbbe’s-suâl mezbûr Hasan Çelebi cevâbında fi’l-vâki‘ yedine verdiği temessükü mûcibince müdde‘î-i mezbûr Mustafa Çelebi’ye yedinden iştirâ ve kabz eylediği kereste semeninden bâkī zimmetinde yüz dört guruş ve bir zolata deyni olduğunu ikrâr ve i‘tirâf etmeğin mûcibince meblağ-ı bâkī-i mezbûr yüz dört guruş ile bir zolatayı mezbûr Mustafa Çelebi’ye edâ ve teslîme merkūm Hasan Çelebi’ye tenbîh olunup mâ-vaka‘a bi’t-taleb ketb olundu. Fi’l-yevmi’s-sânî aşer min-Şa‘bâni’l-mu‘azzam li-sene sitte aşere ve mi’e ve elf. Şuhûdü’l-hâl: Ali Efendi b. Ahmed, Mehmed Efendi b. Ahmed, İsmail Efendi el-kādı, Ömer Efendi el-kādı, Veli Efendi el-kādı, Mehmed Efendi el-kādı, el-Hâc Yusuf b. Osman.