Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 547 Hüküm no: 575 Orijinal metin no: [144b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kalpazanlık yapanların cezalandırılacağı ile ilgili ferman kaydı Sadr-ı Rum ve İstanbul ve Galata ve Eyüp kādıları -zîdet fezâiluhüm- zîr-i hükûmet-şiârınızda mütemekkin Rum ve Ermeni ve Yahûdî tâifesinin kethüdâların ve Cemâ‘atbaşıların getirdip sâdır olan fermân-ı âlînin mazmûnunu kendilerine tefhîm ve tâife-i mezbûrûnun koltuk ta‘bîr olunur simkeş kalpzenleri ve para ve akçe kırıkçıları ve kalpazanlık edenler ve kalp akçe alıp satmağı mu‘tâd edenlerden fî-mâ-ba‘d içlerinde nesne bulunmayıp ve bulunmak olursa Cemâ‘atinde bulunan Cemâ‘atbaşıları ve kethüdâları eşedd-i ukūbet ile mu‘âkıb ve mûcib-i ibret olmalarını âgâh ve ba‘de’l-yevm ellerinde bu makūle şey bulunmayacağını her tâifeden başka başka hüccet ve ta‘ahhüdlerin gereği gibi tahrîr ve zabt edip İstanbul ve nevâhîsi mahkemelerinde kaydettirdip ve ellerinden [a]lınan hüccetler darbhâne nâzırı yedinde hıfz ve dâimâ her tarafda tecessüs ve tefahhusdan hâlî olmayalar, mütenebbih olmayanları tertîb-i cezâları için huzûra arz [u] i‘lâm etmekde ihtimâm edesiz. Fî 4 min-Muharremü’l-haram sene 1116.