Rumeli Sadâreti Mahkemesi 272 Numaralı Sicil (H. 1171-1172/ M. 1758) cilt: 74, sayfa: 70 Hüküm no: 8 Orijinal metin no: [3a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Bey’in kölesi Osman’ın hür olduğuna dair iddiasının yalan olduğu Ma‘rûz, Rıkkını mu‘terif olan orta boylu sarı kaşlı, ela gözlü Osman nâm gulâm mahfil-i şer‘iyyâtda rakīk olup abd-i memlûkü olmak üzere kendüye vaz‘-ı yedi mütehakkık olan bâ‘isü’l-i‘lâm es-Seyyid Ali Bey b. es-Seyyid Mustafa Bey b. Sunullah Paşa’nın sâbitü’l-vekâle vekîli olan es-Seyyid el-Hâc İbrahim Efendi muvâcehesinde, ben müvekkil-i mûmâ-ileyhin dört seneden beri yedinde Sırfiyyü’l-asl abd-i memlûkü olup lâkin ba‘zı kimesnelerin iğvâlarıyla medîne-i Bosna kazâsı nevâhîsinden Liyono? nâhiyesinde sâkin hürrü’l-asl ehl-i zimmet Tripo Meryano zimmînin firâşından hâsıl ve zevcesi hurretü’l-asl Dakra? nâm Nasrâniyeden mütevellid hürrü’l-aslım deyü da‘vâ ve rıkka inkıyâddan ibâ vü imtinâ‘ etmişdim. Hâlâ vech-i muharrer üzere hürriyet da‘vâmın aslı olmayıp da‘vâmda kâzib olmamla el-yevm müvekkil-i mûmâ-ileyh es-Seyyid Ali Bey’in abd-i memlûküyüm deyü ba‘de’l-ikrâr ve’t-tasdîk kemâ-kân rıkka inkıyâd eylediği huzûr-ı âlîlerine i‘lâm olundu. Fî 26 Cemâziyelâhire sene 1171.