Rumeli Sadâreti Mahkemesi 272 Numaralı Sicil (H. 1171-1172/ M. 1758) cilt: 74, sayfa: 69 Hüküm no: 7 Orijinal metin no: [2b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Ağa’nın Hatice Hatun’da olan alacağının tahsil olunması Ma‘rûz Sâhib-i arzuhâl el-Hâc Mehmed Ağa b. Halil mahfil-i şer‘iyyâtda zâtı ta‘rîf-i şer‘î ile mu‘arrefe olan arzuhâlde ismi mezkûre Hadice bt. Abdullah nâm hatun muvâcehesinde mezbûre Hadice Hatun zimmetinde bin yüz altmış yedi senesi Şa‘bânı gurresinde Şeyh Ebulvefâ kurbünde sâkin olduğum menzilimde malımdan ve yedimden iktirâz eylediği yüz elli iki buçuk guruş ba‘dehu kezâlik yedimden iktirâz ve kabz eylediği yüz yirmi dört guruş ve altmış dokuz senesi Zilka‘desi’nde dahi kezâlik yedimden iktirâz ve kabz eylediği iki yüz elli guruş ki min-haysü’l-mecmû‘ beş yüz yirmi altı buçuk guruş hakkım olmağla mezbûre Hadice Hatun Mimarsinan mahallesinde vâki‘ Kâğıd Emini Mehmed Efendi Vakfı’ndan bi’l-icâreteyn mutasarrıfe olduğu vakıf menzilini mütevellîsi ma‘rifetiyle deyn-i mezbûru mukābelesinde bana ferâğ etmiş idi. Lâkin ferâğ-ı mezbûr beynimizde kat‘î olmamağla meblağ-ı mezbûru taleb ederim deyü da‘vâ etdikde mezbûre [3a] Hadice Hatun dahi cevâbında ber-vech-i muharrer bey‘-i mezbûru tasdîk edip lâkin müdde‘î-i mezbûra cihet-i mezkûreden zimmetinde ancak iki yüz elli guruş deyni olduğunu ikrâr ve ziyâde iki yüz yetmiş altı buçuk guruş müdde‘âsını inkâr etmekle müdde‘î-i mezbûr el-Hâc Mehmed Ağa zikr olunan altmış senesi Şa‘bân’ı gurresiyle müverrah temessük mûcebince yüz elli iki buçuk guruş müdde‘âsını lede’t-tezkiye şehâdetleri makbûle olan Mollahüsrev mahallesi imâmı Abdüssamed Efendi b. Mehmed ve Çörekçi Ahmed Çelebi b. Mehmed şehâdetleriyle mezbûre Hadice Hatun’un zevci ve tarafından müseccel vekîli olan Eyüb Ağa muvâcehesinde vech-i şer‘î üzere isbât edip ve ba‘dehu ikrâz ve teslîm etmiş idim deyü müdde‘âsı olan yüz yirmi dört guruşu isbâtdan izhâr-ı acz ile istihlâf edip mezbûre Hadice Hatun’a yemîn teklîf olundukda merkūme Hatice Hatun’ dahi yemînden nükûl etmeğin mûcebiyle ikrârıyla sâbit olan iki yüz elli guruş ve beyyine ile sâbit olan yüz elli iki buçuk guruş ve nükûlüyle sâbit olan yüz yirmi dört guruş ki min-haysü’l-mecmû‘ beş yüz yirmi altı buçuk guruşu müdde‘î-i mezbûr el-Hâc Mehmed Ağa’ya edâ ve teslîme merkūme Hatice Hatun’a tenbîh olunduğu huzûr-ı âlîlerine i‘lâm olundu. Fî 25 Cemaziyelâhire sene 1171.