Bab Mahkemesi 54 Numaralı Sicil (H. 1102 / M. 1691) cilt: 20, sayfa: 391 Hüküm no: 479 Orijinal metin no: [83b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sâliha bt. Ali’nin boşanma ve mehir iddiasının reddi Mahmiye-i İstanbul’da Ali Paşa-yı Atîk mahallesi sâkinelerinden olup, zâtını ma‘rifet-i şer‘iyye ile ârifân el-Hâc Halil b. Hasan ve Ahmed Çelebi b. Mustafa ta‘rîfleriyle mu‘arrefe olan Sâliha bt. Ali nâm hâtun meclis-i şer‘-i şerîf-i enverde, zevci işbu râfi‘ü’l-kitâb Mehmed Çelebi b. Ali mahzarında üzerine da‘vâ ve takrîr-i kelâm edip, zevcim mezbûr Mehmed Çelebi târih-i kitâbdan beş gün mukaddem beni talâk-ı selâse ile tatlîk etmekle, zimmetinde mütekarrir ve ma‘kūdun-aleyh olan üç bin akçe mehr-i müeccelim taleb ederim suâl olunsun dedikde, gıbbe’s-suâl ve akībe’l-inkâr, müdde‘iye-i mezbûreden müdde‘âsına mutâbık beyyine taleb olundukda, ityân-ı beyyineden izhâr-ı acz ile istihlâf etmeğin, fi’l-hakīka târih-i mezbûrda müdde‘iye-i mezbûre Sâliha’yı talâk-ı selâse ile tatlîk etmeyip, ol vechile müdde‘iye-i mezbûre hâlâ kendi mübâyene olmadığına mezbûr Mehmed Çelebi’ye yemîn teklîf olundukda, ol dahi hasbe’l-mes’ûl yemîn billâhi te‘âlâ etmeğin, mûcebiyle müdde‘iye-i mezbûre bilâ-beyyine bî-vech mu‘ârazadan men‘ birle, mâ vaka‘a bi’t-taleb ketb olundu. Fi’l-yevmi’s-sânî ve’l-ışrîn min Cumâdelâhire li sene 1102. Şuhûdü’l-hâl: İbrahim Çelebi b. Ahmed, İbrahim Çelebi b. Mehmed, Ali b. Bâli, Mustafa b. Mehmed ve gayruhüm.