Bab Mahkemesi 54 Numaralı Sicil (H. 1102 / M. 1691) cilt: 20, sayfa: 390 Hüküm no: 478 Orijinal metin no: [83b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Zülfikar Bey b. Abdullah’ın menzilini Mustafa Efendi b. Şeyh Mehmed Efendi’ye satması Mahmiye-i İstanbul’da Kâtib Murad mahallesi sâkinlerinden Zülfikar Bey b. Abdullah nâm kimesne meclis-i şer‘-i şerîf-i enverde, bâ‘isü hâze’l-kitâb Mustafa Efendi b. eş-Şeyh Mehmed Efendi mahzarında ikrâr ve takrîr-i kelâm edip, akd-i âti’z-zikrin sudûruna değin yedimde mülk ve hakkım olup, mahalle-i mezbûrede vâki‘ bir tarafdan ba‘zan Fâtıma Hâtun ve ba‘zan Ümmühâni Hâtun mülkleri ve bir tarafdan Receb Bey mülkü ve bir tarafdan ba‘zan Neyzen Mustafa mülkü ve avârız vakfı ve iki tarafdan tarîk-i âm ile mahdûd bi hesâb-ı terbî‘î yedi yüz yirmi zirâ‘ arsa ve kezâlik bi hesâb-ı mezbûr üç yüz zirâ‘ mülk taş duvarı ve binâ ve eşcâr-ı müsmire ve gayr-ı müsmireyi müştemile bahçeyi, bi cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık mezbûr Mustafa Efendi’ye bey‘-i kat‘î ile yüz seksen dört esedî guruş ile bir kabza adedi nâ-ma‘lûm fülûs-ı muzî‘aya bey‘ ve temlîk ve teslîm, ol dahi ber vech-i muharrer iştirâ ve temellük ve kabz edip ve semen-i mezbûr yüz seksen dört guruşu bana edâ ve teslîm, ben dahi yedinden tamâmen ahz u kabz eyledim. Ba‘de’l-yevm bahçe-i mahdûd-ı mezkûre merkūm Mustafa Efendi’nin mülk-i müşterâsı ve hakk-ı sırfı olmuşdur, keyfe mâ yeşâ ve yahtâr mutasarrıf olsun dedikde, gıbbe’t-tasdîki’ş-şer‘î ve’t-tahkīki’l-mer‘î mâ-vaka‘a bi’t-taleb ketb olundu. Fi’l-yevmi’s-sâdis ve’l-ışrîn min Cumâdelâhire li sene 1102. Şuhûdü’l-hâl: Abdülkādir Efendi b. İsa, Ali Bey b. Yakub, Hâfız İbrahim b. Mehmed, Mustafa Çelebi b. Osman, Yahya Çelebi b. Ahmed.