Rumeli Sadâreti Mahkemesi 272 Numaralı Sicil (H. 1171-1172/ M. 1758) cilt: 74, sayfa: 140 Hüküm no: 119 Orijinal metin no: [21b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Süleyman Ağa’nın hürriyetini ispat eden kölesi Hasan için Berber Mehmed’e ödemiş olduğu bedelin köle Hasan’dan tahsili Ma‘rûz, Bâ‘is-i i‘lâm el-Hâc Süleyman Ağa b. Abdullah mahfil-i şer‘iyyâtda sâbıkā rıkk olmak üzere vaz‘-ı yed eylediği işbu orta boylu, kara kaşlı, sarı ela gözlü Hasan nâm gulâm muvâcehesinde merkūm Hasan bin yüz altmış yedi senesinde mahmiye-i İstanbul’da Davudpaşa mahallesinde sâkin olduğum menzilde gāib ani’l-beled Esirci tâifesinden Ahıskalı Berber el-Hâc Mehmed nâm kimesnenin yedinde Gürciyyü’l-asl rıkka münkād abd-i memlûkü iken iki yüz guruş semen-i medfû‘ ve makbûza ba‘de’l-iştirâ ve’l-kabz iki sene mürûrunda mevsûf-ı mezkûr Hasan’ı iki yüz on bir guruş semen-i medfû‘ ve makbûza Attâr Mehmed Çavuş’a bey‘ ve teslîm, ol dahi ba‘de’l-iştirâ ve’l-kabz bir sene mürûrunda Za‘îm Mehmed Ağa’ya iki yüz on guruş semen-i medfû‘ ve makbûza bey‘ ve teslîm, ol dahi ba‘de’l-iştirâ ve’l-kabz yedinde iken ben Çıldır eyâletinde vâki‘ Ahıska kazâsına muzâfe Büyükcanbâz nâm karye ahâlîsinden Kumşekeroğlu Osman b. Ali’nin firaşından hâsıl ve zevce-i menkûhası hürretü’l-asl Fâtıma bt. Ebubekir’den mütevellid olup bana ve ebeveynime kat‘â rıkk târî olmamış, hürrü’l-aslım deyü bundan akdem za‘îm-i merkūmun vekîl-i şer‘îsi Süleyman nâm kimesne muvâcehesinde da‘vâ ve müdde‘âsını vech-i şer‘î üzere ba‘de’l-isbât sebîli tahliye olundukdan sonra za‘îm-i merkūm Mehmed Ağa semen-i mezkûr iki yüz on guruş ile merkūm Attâr Mehmed Çavuş’a merkūm Mehmed Çavuş dahi semen-i mezkûr iki yüz on bir guruş ile bana rücû‘ ve ahzedip lâkin ben mevsûf-ı mezbûr Hasan’ı târîh-i mezkûrda bâyi‘-i evvel-i mezbûr Berber Mehmed’in yedinde iken şirâ irâdesinde olduğumda mezbûr Hasan ben Gürciyyü’l-asl abdim beni iştirâ eyle demekle, ben dahi kendüyü ol mikdâr semen-i medfû‘a mezbûr Berber Mehmed’den iştirâ etmiş idim. Mezbûr Hasan’ın ber-vech-i muharrer emr ve tağrîrine ve bâyi‘-i merkūmun mekânı ma‘lûm olmadığına binâen merkūm Hasan’ın semen olmak üzere bâyi‘-i merkūm Berber Mehmed’e medfû‘um olan meblağ-ı mezkûr iki yüz guruşu mezbûr Hasan’dan hâlâ taleb ederim deyü da‘vâ ve mezbûr Hasan cevâbında müdde‘î-i merkūmun ber-vech-i muharrer müdde‘âsını tav‘an ikrâr ü i‘tirâf etmeğin alâ-mûcibi ikrârihi mezbûr Hasan meblağ-ı mezkûr iki yüz guruşun müdde‘î-i mezbûr el-Hâc Süleyman Ağa’ya edâsıyla şer‘an ilzâm olunduğu huzûr-ı âlîlerine i‘lâm olundu. Fî 5 Şa‘bân sene 1171.