Rumeli Sadâreti Mahkemesi 272 Numaralı Sicil (H. 1171-1172/ M. 1758) cilt: 74, sayfa: 141 Hüküm no: 120 Orijinal metin no: [21a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Attar Mehmed Çavuş’un hürriyetini ispat eden kölesi Hasan için Süleyman Ağa’ya ödediği bedeli geri alması Ma‘rûz, Bâ‘is-i i‘lâm Attâr Mehmed Çavuş b. Mustafa mahfil-i şer‘iyyâtda el-Hâc Süleyman Ağa b. Abdullah muvâcehesinde târîh-i i‘lâmdan iki sene mukaddem merkūm el-Hâc Süleyman Ağa’dan rıkka münkād yedinde olup Gürciyyü’l-asl abd-i memlûkü olmak üzere iki yüz on bir guruş semen-i medfû‘ ve makbûza iştirâ ve kabz eylediğim orta boylu, kara kaşlı, sarı ela gözlü Müslimü’l-mille işbu hâzır bi’l-meclis Hasan nâm gulâmı ben dahi Küçükayasofyalı Za‘îm Mehmed Ağa’ya iki yüz on guruş semen-i medfû‘ ve makbûza bey‘ ve teslîm, ol dahi ba‘de’l-iştirâ ve’l-kabz yedinde iken ben Çıldır eyâletinde vâki‘ Ahıska kazâsına muzâfe Büyükcanbâz nâm karye ahâlîsinden Kumşekeroğlu Osman b. Ali’nin firâşından hâsıl ve zevcesi hürretü’l-asl Fâtıma bt. Ebubekir’den mütevellid olup bana [22a] ve ebeveynime kat‘â rıkk târî olmamış hürrü’l-aslım deyü mahfil-i şer‘iyyâtda za‘îm-i merkūmun vekîl-i şer‘îsi Süleyman nâm kimesne muvâcehesinde ba‘de’d-da‘vâ ve’l-inkâr mevsûf-ı mezbûr Hasan ber-vech-i muharrer müdde‘âsını taraf-ı şer‘den yedine verilen bir kıt‘a hüccet-i şer‘iyyede isimleri mastûr şâhidîn-i âdilîn şehâdetleriyle vech-i şer‘î üzere isbât edip hürriyetine hüküm ve sebîli tahliye olunmağla gulâm-ı mezbûrun semeni olan meblağ-ı mezkûru za‘îm-i merkūm Mehmed Ağa hükm-i hâkimü’ş-şer‘le benden bi’l-mürâca‘a ahzedip ben dahi merkūm el-Hâc Süleyman Ağa’ya ber-vech-i muharrer medfû‘um olan iki yüz on guruşu bi’l-mürâca‘a hâlâ taleb ederim deyü ba‘de’d-da‘vâ merkūm el-Hâc Süleyman Ağa cevâbında minvâl-i muharrer müdde‘î-i merkūm Attâr Mehmed Çavuş’un müdde‘âsını ikrâr ü i‘tirâf etmeğin alâ-mûcibi i‘tirâfihî mevsûf-ı mezkûrun semeni olan meblağ-ı mezkûr iki yüz on guruşu müdde‘î-i merkūm Attâr Mehmed Çavuş’a edâ ve teslîme mezbûr el-Hâc Süleyman Ağa’ya tenbîh olunduğu huzûr-ı âlîlerine i‘lâm olundu. Fî 5 Şa‘bânı sene 1171.