Rumeli Sadâreti Mahkemesi 272 Numaralı Sicil (H. 1171-1172/ M. 1758) cilt: 74, sayfa: 149 Hüküm no: 132 Orijinal metin no: [24a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Osman Ağa’dan haksız olarak almış olduğu parayı iade etmesi hususunda Mahmud Ağa’ya tenbihte bulunulması Ma‘rûz, Sâhib-i arzuhâl es-Seyyid Osman Ağa mahfil-i şer‘iyyâtda derûn-ı arzuhâlde mezkûrü’l-ism es-Seyyid Mahmud Ağa mahzarında vilâyet-i Anadolu’da Kayseriye sancağında vâki‘ el-Hâc Ahmed Paşa Evkāfı mukāta‘alarından Tomarza ve tevâbi‘i mukāta‘asını bin yüz yetmiş senesi Martı ibtidâsından Şubatı gāyetine değin bir sene zabt etmek üzere vakf-ı mezbûrun ber-vech-i iştirâk mütevellîleri gāibûn ani’l-beled Süleyman Bey ve Ali Bey ve Mehmed Ağa’dan işbu yedimde olan bir kıt‘a temessükleri mantûkunca iki bin iki yüz otuz guruşa der-uhde ve iltizâm etmişken merkūm es-Seyyid Mahmud Ağa sene-i mezbûrede mukāta‘a-yı mezkûreyi mezbûrûndan ben der-uhde ve iltizâm eyledim deyü bir müzevver temessük tedârikiyle zabtıma mâni‘ ve yirmi gün fuzûlî zabt ve keff-i yedi için gāib ani’l-beled Kayseriyeli Horosoğlu Mustafa Çelebi yediyle malımdan beş yüz guruşumu bi-gayr-ı hakkın ahzetmekle meblağ-ı mezkûru merkūm Mahmud Ağa’dan hâlâ taleb ederim deyü ba‘de’d-da‘vâ ve’l-inkâr müdde‘î-i merkūm ber-vech-i muharrer müdde‘âsını beyâna kādir olmayıp talebiyle merkūm es-Seyyid Mahmud Ağa’ya yemîn teklîf olundukda yemînden nükûl etmeğin mûcebiyle meblağ-ı mezbûr beş yüz guruşu müdde‘î-i merkūm es-Seyyid Osman Ağa’ya redd ü teslîme merkūm es-Seyyid Mahmud Ağa’ya tenbîh olunduğu huzûr-ı âlîlerine i‘lâm olundu. Fî 11 Şa‘ban sene 1171.