Rumeli Sadâreti Mahkemesi 272 Numaralı Sicil (H. 1171-1172/ M. 1758) cilt: 74, sayfa: 149 Hüküm no: 131 Orijinal metin no: [23b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hoca Mehmed Efendi’nin Mustafa Sadık Efendi’ye olan borcunu ödemek üzere taahhütte bulunması Bâ-mühr-i hazret-i efendi, Ma‘rûz, Sâhib-i arzuhâl Hoca Mehmed Efendi meclis-i şer‘-i münîrde derûn-ı arzuhâlde mezkûrü’l-ism müderrisînden Mustafa Sadık Efendi mahzarında mûmâ-ileyh Mustafa Sadık Efendi bin yüz yetmiş senesinde mevâzi‘-i ma‘lûmede vâki‘ arsalarını âhara bey‘a ve kabz-ı semene ve semenlerinden düyûnunu edâ ve Hocapaşa kurbünde Elvanbey mahallesinde vâki‘ muhterik menzil arsası üzerine müceddeden bir menzil binâ etdirmek üzere beni tevkîl, ben dahi ba‘de kabûlü’l-vekâle arsalarını âhara altı bin beş yüz seksen beş guruş semen-i makbûza bi’l-vekâle bey‘ ve semenlerinden altı bin üç yüz otuz guruşuyla ba‘zan düyûnunu edâ ve ba‘zan müceddeden binâ olunan menziline sarf ve iki yüz elli guruşunu dahi kendi umûruma sarfla istihlâk etmiş idim. Meblağ-ı mezkûr iki yüz elli beş guruş ile kendüden iştirâ ve kabz eylediğim [24a] beynimizde ma‘lûm mülk arsa bahâsından sekiz yüz doksan beş guruş ki cem‘an iki bin yüz elli guruş mûmâ-ileyh Mustafa Sadık Efendi’ye bâ-temessük edâsı vâcib zimmetimde deynimdir deyü ba‘de’l-ikrâr ve’t-tasdîk ber-minvâl-i muharrer makbûz ve masrûfa ve meblağ-ı mecmû‘-ı mezkûr iki bin yüz guruşdan mâ‘adâ târîh-i i‘lâma gelince bi’l-cümle sâire müte‘allika âmme-i de‘âvî ve kâffe-i mutâlebâtdan her biri âharı ibrâ-i âm ile ibrâ edip ve her biri âharın ibrâsını kabûl ve istisnâ olunan meblağ-ı mecmû‘-ı mezkûru edâya mezbûr Hoca Mehmed Efendi ta‘ahhüd eylediği huzûr-ı âlîlerine i‘lâm olundu Fî 11 Şa‘ban sene 1171.