Bab Mahkemesi 54 Numaralı Sicil (H. 1102 / M. 1691) cilt: 20, sayfa: 396 Hüküm no: 485 Orijinal metin no: [85a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Eyüb Ağa b. Bâli’nin borcuna mukabil rehin verdiği menzilini satmak üzre Halil Çelebi b. İlyas’ı vekil tayin etmesi Havâss-ı Aliyye Kazâsı’na tâbi‘ Kağıdhâneköyü demekle ma‘rûfe karye sükkânından Eyüb Ağa b. Bâli nâm kimesne meclis-i şer‘-i şerîf-i enverde, işbu bâ‘isü’l-kitâb Mustafa Efendi b. İbrahim mahzarında ikrâr-ı tâm ve takrîr-i kelâm edip, mezbûr Mustafa Efendi on yedi İstanbul altını ve on altı Mısrî altın ve on sekiz esedî [guruşu] ikrâz ve teslîm, ben dahi iktirâz ve kabz edip ve yine yedinden işbu emr-i kabz eylediğimiz beynimizde ilm-i şer‘î ile ma‘lûm semeni târih-i kitâbdan bir sene tamâmına değin müeccel ve mev‘ûd biri orta ve ikisi yan üç kıt‘a Acem keçesi bahâsından dahi elli beş buçuk guruş ki, min haysü’l-mecmû‘ yüz elli guruş mezkûr Mustafa Efendi’ye zimmetimde lâzımü’l-edâ ve vâcibü’l-kazâ deynim olup, mukābelesinde silk-i mülk-i sahîhimde münselik olup karye-i mezbûrede vâki‘ bir tarafı Mehmed Çelebi mülkü ve bir tarafı İbrahim Paşa zevcesi mülkü ve bir tarafı el-Hâc Bâli Beşe mülkü ve bir tarafı tarîk-i âm ile mahdûd, üç bâb fevkānî oda ve bir köşk ve iki su kuyusu ve eşcâr-ı müsmire ve gayr-ı müsmire bahçeyi müştemil mülk menzilimi, ba‘de’t-tahliyeti’ş-şer‘iyye merkūm Mustafa Efendi’ye irhân ve teslîm, ol dahi irtihân ve kabûl ve kabz eyledi. Meblağ-ı mezbûr ba‘de tamâmi’l-ecel zimmetimde lâzımü’l-edâ ve vâcibü’l-kazâ deynimdir dedikde, gıbbe’t-tasdîki’ş-şer‘î mezbûr Eyüb Ağa meclis-i şer‘de Halil Çelebi b. İlyas mahzarında ikrâr ve i‘tirâf edip, müddet-i mezkûre tamâmında edâ-i deyn ile fekk-i rehin etmişdim, menzil-i mezbûru ba‘de’l-müzâyede semen-i misli ile âhara bey‘ ve kabz-ı semen ve deyn-i mezbûru edâ ve fazla kalırsa bana îsâle ve husûs-ı mezbûr mütevakkıf olduğu umûrun küllîsine azl ve in‘izâlden masûne vekâlet-i devriye ile mezbûr Halil Çelebi b. İlyas tarafımdan vekîl ve nâib-i menâb nasb ve ta‘yîn eyledim dedikde, ol dahi vekâlet-i mezbûreyi kabûl ve merâsimini kemâ-yenbağī edâya ta‘ahhüd etmeğin, mâ hüve’l-vâki‘ bi’t-taleb ketb olundu. Fi’l-yevmi’t-tâsi‘ ve’l-ışrîn min Cumâdelâhire sene 1102. Şuhûdü’l-hâl: Mehmed Efendi b. Himmet, Hasan b. Aziz, Mustafa b. Nalçacı Şaban, Sâlih b. Abdullah, Molla Mehmedî Efendi b. Sefer ve gayruhüm.