Bab Mahkemesi 54 Numaralı Sicil (H. 1102 / M. 1691) cilt: 20, sayfa: 397 Hüküm no: 486 Orijinal metin no: [85b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayşe bt. Abdullah’ın mehir alacağını ölen kocasının terekesinden tahsil etmesi Mahmiye-i İstanbul’da Zeyrek mahallesinde sâkin iken bundan akdem vefât eden Tokatlı Mustafa Ağa nâm kimesnenin verâseti, zevcesi Ayşe bt. Abdullah ile sulbî sagīr oğlu Mehmed ve kebîr oğulları Ahmed ve Ali’ye ve kebîre kızı Ümmühâni’ye münhasıra olup, ba‘dehû sagīr-i mezbûr Mehmed dahi vefât edip, verâseti vâlidesi mezbûr Ayşe ile li ebeveyn er karındaşları mezbûrân Ali ve Ahmed ve kız karındaşı mezbûre Ümmühâni’ye münhasıra olup, ba‘dehû mezbûre Ümmühâni dahi vefât edip, verâseti zevci Mehmed Bey’e ve li ebeveyn er karındaşları mezbûrân Ali ve Ahmed’e münhasıra olup, ba‘dehû mezbûr Ali vefât edip, verâseti sulbî oğlu Osman’a ve sulbiye kebîre kızı Fâtıma’ya münhasıra olup, ba‘dehû mezbûr dahi Ahmed fevt olup, verâseti zevcesi Fâtıma bt. Abdullah ve vâlidesi Sâime bt. Abdullah nâm hâtunlar ile sulbî kebîr oğulları Mustafa ve Mehmed’e münhasıra ve tashîh-i mes’elesi bi tarîki’l-münâsahati’ş-şer‘iyye üç yüz seksen dört sehimden olup, sihâm-ı mezbûrenin altmış dört sehimi mezbûre Ayşe’ye ve doksan altı sehimi mezbûr Osman’a ve kırk sekiz sehimi kız karındaşı mezbûre Fâtıma’ya ve otuz iki sehimi Ümmühâni zevci mezbûr Mehmed Bey’e ve on sekiz sehimi zevce-i mezbûre Fâtıma ve yirmi dört sehimi mezbûre Sâime’ye ve elli birer sehimi mezbûrân Mustafa ile Mehmed’den her birine isâbet ve intikāl eylediği şer‘an zâhir ve müte‘ayyin oldukdan sonra müteveffâ-yı evvel-i mezbûr Tokatlı Mustafa Ağa’nın zevce-i metrûkesi mezbûre Ayşe Hâtun ba‘de’t-ta‘rîfi’ş-şer‘î meclis-i şer‘-i şerîf-i enverde, kendi tarafından asîl ve mezbûrûn Mehmed ve Fâtıma ve Sâime taraflarından husûs-ı âti’l-beyâna bimâ-hüve nehcü’s-sübût vekîlleri olduğu sâbit olmağla vekîl olan mezbûr Mustafa Çelebi mahzarında üzerine da‘vâ ve takrîr-i kelâm edip, bin akçe mehr-i müeccel tesmiyesiyle müteveffâ-yı evvel-i mezbûr Mustafa Ağa’nın ben zevce-i menkûhasıyken merkūm Tokatlı Mustafa Ağa vefât edip, cemî‘ terekesini ber vech-i meşrûh bi’l-verâse mezbûrûn Mustafa ve Mehmed ve Fâtıma ve Sâime ahz u kabz ve vaz‘-ı yed etmeğin, hâlâ merkūm Mustafa Çelebi’ye suâl olunup mehr-i müeccel-i mezbûrum tereke-i müteveffâ-yı mezbûrdan alıverilmesi matlûbumdur dedikde, gıbbe’s-suâl vekîl-i merkūm Mustafa cevâbında, müdde‘iye-i mezbûre Ayşe Hâtun dört bin akçe mehr-i müeccel tesmiyesiyle ceddi müteveffâ-yı mezbûr Tokatlı Mustafa Ağa’nın ile’l-vefât zevce-i menkûhası olduğunu ve terekesine ber vech-i muharrer vaz‘-ı yedlerini bi’l-asâle ve’l-vekâle ikrâr ve i‘tirâf ettikden sonra müdde‘iye-i mezbûre Ayşe Hâtun’a mehr-i müeccel-i mezbûru küllen ya ba‘zan zevci müteveffâ-yı mezbûrdan hayâtında istîfâ ve yâhud zimmetini ibrâ ya âhara havâle etmediğine yemîn teklîf olundukda, ol dahi alâ vefki’l-mes’ûl yemîn billâhi’l-aliyyi’l-a‘lâ etmeğin, mûcebince mehr-i müeccel-i mezbûr dört bin akçeyi müteveffâ-yı evvel-i mezbûr defe‘âtle Mustafa Ağa’nın tereke-i vâfiyesinden müdde‘iye-i mezbûreye edâ ve teslîm etmek üzre mezbûr Mustafa Çelebi’ye tenbîh olundukdan sonra müdde‘iye-i mezbûre Ayşe Hâtun merkūm Mustafa karındaşı mezbûr Mehmed ve Sâime ve zevce-i mezbûre Fâtıma’nın ber vech-i muharrer mecmû‘unun yüz kırk dört sehim hisselerine mehr-i müeccel-i mezbûrdan isâbet eden bin beş yüz akçeyi merkūm Mustafa Çelebi yedinden ahz u kabz eyledim dedikde, gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâmin aşer min Cumâdelâhire li sene isneteyn ve mi’e ve elf. Şuhûdü’l-hâl: Mahmud b. Hasan, Ali b. Bâli, Mustafa Beşe b. Mehmed, Mehmed Beşe b. Abdullah, İbrahim Çelebi b. Ahmed, Hurrem Efendi b. Ali.