Bab Mahkemesi 54 Numaralı Sicil (H. 1102 / M. 1691) cilt: 20, sayfa: 398 Hüküm no: 487 Orijinal metin no: [85b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Derviş b. Durmuş’un menzilini oğlu Abdullah Beşe’ye satması Mahmiye-i İstanbul’da Debbâğzâde mahallesi sâkinlerinden Derviş b. Durmuş nâm kimesne meclis-i şer‘-i şerîf-i enver ve mahfil-i dîn-i münîf-i ezherde, sulbî kebîr oğlu bâ‘isü hâze’l-kitâb Abdullah Beşe nâm kimesne mahzarında ikrâr ve takrîr-i kelâm edip, akd-i âti’z-zikrin sudûruna değin yedimde mülk ve hakkım olup, mahalle-i mezbûrede vâki‘ bir tarafdan Ebûbekir Efendi mülkü ve bir tarafdan ba‘zan Ahmed Beşe mülkü ve ba‘zan mukaddemâ benden iştirâ eylediği menzil ve bir tarafdan tarîk-i âm ile mahdûd fevkānî iki bâb oda ve tahtânî bir bâb oda ve bi’r-i mâyı ve havlu ve kenîfi müştemil mülk menzilimi, cümle tevâbi‘ ve levâhıkı ve kâffe-i hukūk ve merâfıkı ile oğlum mezbûr Abdullah Beşe’ye tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ile on altı bin akçeye bey‘ ve temlîk ve teslîm, ol dahi iştirâ ve temellük ve tesellüm ve kabz etdiğinden sonra semeni olan meblağ-ı mezbûr on altı bin akçeyi oğlum mezbûr Abdullah yedimden tamâmen ahz u kabz eyledim. Ba‘de’l-yevm menzil-i mahdûd-ı mezkûr oğlum mezbûr Abdullah Beşe’nin mülk-i müşterâsı ve hakk-ı sırfı olmuşdur, keyfe mâ yeşâ ve yahtâr mutasarrıf olsun dedikde, gıbbe’t-tasdîki’ş-şer‘î ve’t-tahkīki’l-mer‘î mâ vaka‘a bi’t-taleb ketb olundu. Fi’l-yevmi’t-tâsi‘ ve’l-ışrîn min Cumâdelâhire sene 1102. Şuhûdü’l-hâl: İbrahim Çelebi b. Ahmed, Ahmed Beşe b. İsmail, İbrahim Çelebi b. Ali, Abdurrahman Çelebi b. Derviş, Mustafa Çelebi b. Ahmed, Hüseyin b. Davud, Hasan b. Abdullah, Arpacı Ahmed Beşe b. Mehmed.