Bab Mahkemesi 54 Numaralı Sicil (H. 1102 / M. 1691) cilt: 20, sayfa: 399 Hüküm no: 489 Orijinal metin no: [86a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Ağa b. Hasan’ın Sultan Süleyman tevliyeti karşılığında para verdiği Hüseyin Ağa b. Hasan ile anlaşıp birbirlerinin zimmetlerini ibra ettiği Husûs-ı âti’l-beyânın mahallinde ketb ü tahrîri için matlûben irsâl olunan Mevlânâ Ali Efendi b. Sunullah mahmiye-i İstanbul’da Sofular mahallesi sükkânından Hüseyin Ağa b. Hasan’ın menziline varıp, zeyl-i kitâbda muharrerü’l-esâmi müslimîn huzûrlarında akd-i meclis-i şer‘-i nebevî eyledikde, Mehmed Ağa b. Hasan meclis-i ma‘lûm-ı mezbûrda işbu bâ‘isü’l-kitâb mezkûr Hüseyin Ağa mahzarında ikrâr ve takrîr-i kelâm edip, merkūm Hüseyin Ağa’ya Şâm-ı Şerîf’de vâki‘ Sultan Süleyman tevliyetini bana ettirivermek için üç bin iki yüz doksan beş esedî guruşumu def‘ ü teslîm, ol dahi ber vech-i muharrer ahz u kabz ettiğinden sonra tevliyet-i mezkûreyi kendi üzerine ettirmekle meblağ-ı mezbûr üç bin iki yüz doksan beş esedî guruşun bin iki yüz doksan beş guruşuyla deynim olan işbu hâzır bi’l-meclis Selânik cemâ‘atinden İsak v. Marko nâm Yahudi ile üçümüz bir meclisde iken merkūm Hüseyin Ağa üzerine havâle-i sahîha-i şer‘iyye ile havâle edip, her birimiz dahi havâle-i mezbûreyi kabûl ve bâkī iki bin guruşunu mezbûr Hüseyin Ağa’dan taleb ve da‘vâ eylediğimde beynimizde nizâ‘-ı küllî vukū‘undan sonra muslihûn tavassut edip, merkūm Hüseyin Ağa ile beni da‘vâ-yı mezkûremden bin beş yüz guruş üzerine sulh eylediklerinde, ol dahi sulh-ı mezbûru kabûl ve bedel-i sulh olan meblağ-ı mezbûru mezbûr Hüseyin Ağa yedinden bi’t-tamâm ve’l-kemâl ahz u kabz edip, biz ba‘de’l-yevm husûs-ı mezbûra ve bi’l-cümle târih-i kitâba gelince beynimizde cereyân eden ahz u i‘tâ ve mu‘âmelât-ı şettâya müte‘allika da‘vâda mezbûrun zimmetini ibrâ-i âm ile ibrâ ve iskāt edip, ol dahi husûs-ı mezbûra ve bedel-i sulh olmak üzre medfû‘u olan meblağ-ı mezbûra ve bi’l-cümle târih-i kitâba gelinceye dek beynimizde cereyân eden ahz u i‘tâya müte‘allika cemî‘-i da‘vâdan zimmetimi ibrâ ve iskāt eyledik dedikde, gıbbe’t-tasdîki’ş-şer‘î vâki‘ hâli Mevlânâ-yı mezbûr mahallinde tahrîr ve ba‘dehû ma‘an ba‘s olunan Çukadâr Hasan Beşe b. Abdullah ve Mehmed b. İsmail ile meclis-i şer‘a gelip alâ vukū‘ihî inhâ ve takrîr etmeğin, mâ vaka‘a bi’t-taleb ketb olundu. Fî gurre-i Recebi’l-ferd li sene 1102. Şuhûdü’l-hâl: Ali Efendi b. Abdurrahman, Hasan Beşe b. İbrahim, Hüseyin Beşe b. Abdülkādir, Kabçı? el-Hâc Mehmed, Ahmed Efendi b. Hasan, el-Hâc Mustafa Beşe b. İbrahim, Hasan b. Abdullah çukadâr, Mehmed b. İsmail ve gayruhüm.