Bab Mahkemesi 54 Numaralı Sicil (H. 1102 / M. 1691) cilt: 20, sayfa: 400 Hüküm no: 490 Orijinal metin no: [86a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Halime bt. Hacı Yahya’nın Mehmed b. Abdullah’tan muhâlaa yoluyla boşanması Medîne-i Hazret-i Ebâ Eyyûb el-Ensârî mahallâtından Düğmeciler mahallesi sâkinelerinden olup zâtı ma‘rifet-i şer‘iyye ile ârifân Said b. Abdullah ve Receb b. Mehmed ta‘rîfleriyle mu‘arrefe olan Halime bt. el-Hâc Yahya nâm hâtun meclis-i şer‘-i şerîf-i enverde, zevc-i muhâlı‘ı işbu sâhibü’l-vesîka Mehmed b. Abdullah mahzarında ikrâr ve takrîr-i kelâm edip, zevcim mezbûr zimmetinde mütekarrir ve ma‘kūdun-aleyh bin akçe mehr-i müeccelimden ve nafaka-i iddet-i mu‘ayyenemden fâriğa olup ve me’ûnet-i süknâm dahi kendi üzerime olmak üzre zevcim mesfûr Mehmed ile muhâla‘a-i sahîha-i şer‘iyye ile muhâla‘a olup, ol dahi hul‘-ı mezbûru kabûl eylediğinden sonra hukūk-ı zevciyyete ve beynimizde ma‘lûm iki yemeni yorgana müte‘allika âmme-i da‘vâdan zevcim mezkûrun zimmetini ibrâ-i âmm-ı râfi‘ü’l-hisâm ile ibrâ ve iskāt eyledim dedikde, gıbbe’t-tasdîki’ş-şer‘î mâ vaka‘a bi’t-taleb ketb [olundu.] Fi’[l-yevmi’s]-sâmin ve’l-ışrîn min Cumâdelâhire li seneti 1102. Şuhûdü’l-hâl: Cafer b. Abdullah, Receb b. Mehmed, Mustafa b. Abdullah, Mustafa Çelebi b. Şaban, Hüseyin b. Mustafa, Nuh b. Osman ve gayruhüm.