Bab Mahkemesi 54 Numaralı Sicil (H. 1102 / M. 1691) cilt: 20, sayfa: 408 Hüküm no: 501 Orijinal metin no: [87b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Mustafa’nın kendisini boşayan ve mehrini ödünç aldığı parayı ödeyen kocası Mustafa Beşe b. Ömer’in zimmetini ibra ettiği Mahmiye-i İstanbul’da Emin Nureddin mahallesinde sâkine ve zâtını İbrahim Beşe b. Mehmed ve Hasan Beşe b. Abdullah ta‘rîfleriyle mu‘arrefe olan Fâtıma bt. Mustafa nâm hâtun meclis-i şer‘-i şerîf-i enverde, zevc-i mutallıkı işbu bâ‘isü’l-kitâb Mustafa Beşe b. Ömer mahzarında ikrâr-ı tâm ve takrîr-i kelâm edip, mezbûr Mustafa Beşe zevc-i dâhilim olup târih-i kitâbdan iki gün mukaddem beni bâyinen tatlîk etmekle zimmetinde mütekarrir ve ma‘kūdun-aleyh olan üç bin akçe mehr-i müeccelimi ve cihet-i karzdan zimmetinde hakkım olan üç guruş ki, cem‘an yirmi sekiz guruş hakkımı ve yedinde [88a] olan tenceremi bana edâ ve teslîm, ben dahi yedinden tamâmen ahz u kabz edip ve iddetim inkızâsına değin ve nafaka ve me’ûnet-i süknâm için beher yevm dört akçe vermek üzre mezbûr Mustafa Beşe ta‘ahhüd etmekle, ben dahi kabûl edip ve nafaka husûsundan mâ‘adâ biribirimiz ile da‘vâ ve nizâ‘ımız kalmamışdır dedikde, gıbbe’t-tasdîki’l-vicâhî mâ vaka‘a bi’t-taleb ketb olundu. Fi’l-yevmi’s-sâmin ve’l-ışrîn min Cumâdelâhire sene 1102. Şuhûdü’l-hâl: İsmail Efendi b. Veli, Hasan Beşe b. ( ) çukadâr, Mehmed Çelebi b. İbrahim, İbrahim Çelebi b. Ahmed, İbrahim b. Kuloğlu Veli.