Bab Mahkemesi 54 Numaralı Sicil (H. 1102 / M. 1691) cilt: 20, sayfa: 407 Hüküm no: 500 Orijinal metin no: [87b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayşe bt. Hasan Yazıcı’nın oğlundan intikal eden miras payını tahsil edip kendisine ulaştıran vekili Hacı Mehmed b. Hüseyin’in zimmetini ibra etmesi Vilâyet-i Anadolu’da medîne-i Trabzon vâlisi oldukdan sonra Azak muhâfızı iken vefât eden Somuncu demekle şehîr Mustafa Paşa b. Mehmed’in vâlidesi olup, zâtını ma‘rifet-i şer‘iyye ile ârifân Mustafa Efendi b. Mehmed ve es-Seyyid Abdülbâki Efendi b. İbrahim ta‘rîfleriyle mu‘arrefe olan Ayşe bt. Hasan Yazıcı nâm hâtun meclis-i şer‘-i şerîf-i enverde, işbu bâ‘isü’l-kitâb el-Hâc Mehmed b. Hüseyin mahzarında ikrâr ve takrîr-i kelâm edip, mesfûr el-Hâc Mehmed’i oğlum müteveffâ-yı mezkûrun terekesinden bana isâbet ve intikāl eden hisse-i irsiyemi ahz u kabz ve bana îsâle bundan akdem tarafımdan vekîl ve nâib nasb ve ta‘yîn edip, ol dahi vekâlet-i mezkûreyi ba‘de’l-kabûl oğlum müteveffâ-yı mezbûrun terekesinden nakid ve menkūl beynimizde ma‘lûm hisse-i irsiyemi ahz u kabz ve bana teslîm etmişdi. El-hâletü hâzihî nakid altmış beş guruşla bir köhne yün örtüsü ve bir sadefkârî pîş-tahta ve bir gaddâre ve iki bakır kalkanı dahi hâlâ bana def‘ ü teslîm, ben dahi yedinden ahz u kabz eyleyip, ba‘de’l-yevm oğlum müteveffâ-yı mezbûrun terekesine ve bi’l-cümle târih-i kitâba gelince beynimizde cereyân eden ahz u i‘tâ ve mu‘âmelât-ı şettâya müte‘allika âmme-i da‘vâdan mezbûrun zimmetini ibrâ-i âmm-ı râfi‘ü’l-hisâm ile ibrâ ve iskāt eyledim dedikde, gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sânî min Recebi’l-ferd li sene isneteyn ve mi’e ve elf. Şuhûdü’l-hâl: Şaban Beşe b. Osman, Hasan Yazıcı, Musa b. Ahmed, el-Hâc Hüseyin b. Abdi.