Bab Mahkemesi 54 Numaralı Sicil (H. 1102 / M. 1691) cilt: 20, sayfa: 409 Hüküm no: 503 Orijinal metin no: [88a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Değirmenci Asvador’un kazaen vefat ettiğinin yerinde tespit edilmesi Vilâyet-i Anadolu’da Erzincan Kazâsı’na tâbi‘ Denkdik? nâm karye ahâlîsinden olup, hâlâ mahmiye-i İstanbul’da Unkapanı Kapısı dâhilinde Hızır Bey mahallesinde vâki‘ mîrî değirmende değirmenci olan Semaven v. Köniğ v. Vartok nâm zimmî meclis-i şer‘-i şerîfde takrîr-i kelâm ve ta‘bîr ani’l-merâm edip, li ebeveyn karındaşım olup zikr olunan değirmende benimle ma‘an değirmenci olan Asvador nâm zimmî târih-i kitâb gecesi ba‘de’l-ışâ değirmende kendi san‘atıyla değirmen-i mezbûr çarhının üzerine vardıkda, çarh-ı mezbûrun bendi mezbûr Asvador’ı direğe sıkıp hâlik olmuşdur, hâlâ kıbel-i şer‘den üzerine varılıp keşf ve mu‘âyene olunmak matlûbumdur deyu husûs-ı mezbûr için fermân-ı şerîf dahi ibrâz etmeğin, imtisâlen-leh savb-ı şer‘den irsâl olunan Ebûbekir Efendi zikr olunan değirmene varıp zeyl-i kitâbda muharrerü’l-esâmi müslimîn ile hâlik-i mezbûr a‘zâsına nazar olundukda, eser-i cerhi olmayıp ber vech-i muharrer direğe sıkıp hâlik olduğu mu‘âyene ve müşâhede olunmağın, vâki‘ hâli mezbûr Ebûbekir Efendi mahallinde ketb ü tahrîr edip, ba‘dehû ma‘an ba‘s olunan Mustafa Beşe b. Mehmed ve Mehmed b. Abdullah ile meclis-i şer‘a gelip alâ vukū‘ihî inhâ etmeğin, mâ hüve’l-vâki‘ bi’t-taleb ketb olundu. Fi’l-yevmi’s-sâlis ve’l-ışrîn min Cumâdelâhire li sene isneteyn ve mi’e ve elf. Şuhûdü’l-hâl: İbrahim Ağa b. Hasan, Ahmed Efendi müezzin, Mustafa Efendi el-müezzin, Ali Çelebi b. Şaban, Berber es-Seyyid Mustafa Çelebi b. ( ), Mehmed Çelebi b. ( ), ( ) b. İbrahim.