Rumeli Sadâreti Mahkemesi 272 Numaralı Sicil (H. 1171-1172/ M. 1758) cilt: 74, sayfa: 376 Hüküm no: 469 Orijinal metin no: [95a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Bey’in Molla Veli aleyhindeki gümüş raht iddiası Ma‘rûz, Sâhib-i arzuhâl Ali Bey b. Hasan Paşa mahfil-i şer‘iyyâtda Molla Veli b. İbrahim muvâcehesinde İstanbul’da Ayasofya-i kebîr kurbünde Şadırvanahırı nâm mahâlde vâki‘ sâkine olduğum odada mevcûd emlâkimden mecmû‘u dört yüz dirhem bir sîm kemer raht ve bir sîm rişmemi târîh-i i‘lâmdan dört ay mukaddem hizmetimde olan işbu hâzır bi’l-meclis es-Seyyid Mehmed bi-gayr-ı hakkın hufyeten ahz ve kayışından söküp parça gümüş oldukdan sonra âhara bey‘ etmek üzere mezbûr Molla Veli’ye vermekle ol dahi ba‘de’l-ahz yüz seksen dirhemini işbu hâzır bi’l-meclis Avram Yahûdi’ye yetmiş dirhemini Salamon Yahûdiye, yedişer paraya bey‘ ve teslîm etmekle ben dahi ol mikdârını Yahûdilerin yedlerinde bulup tamâmen ahzetmiş idim. Hâlâ yüz elli dirhem gümüşüm mezbûr Molla Veli’nin yedinde kalmağla taleb ederim deyü hâzırûn-ı mezbûrûn tasdîkiyle da‘vâ etdikde mezbûr Molla Veli dahi cevâbında benim makbûzum ancak mesfûrân Yahûdilerden kabzını mu‘terif iki yüz dirhemdir deyü ziyâde yüz elli dirhem sîm müdde‘âsını inkâr etmekle müdde‘î-i mezbûr ber-vech-i muharrer ziyâdeyi isbât edemeyip talebiyle mezbûr Molla Veli’ye muvâcehesinde vech-i şer‘î üzere yemîn verilmeğin mûcebiyle müdde‘î-i mezbûr Ali Bey yüz elli dirhem sîm mutâlebesiyle mezbûr Molla Veli’ye bilâ-beyyine-i âdile bî-vech mu‘ârazadan men‘ olundukdan sonra mezbûr Ali Bey ve mesfûrân Avram ve Salamon muvâcehelerinde ber-vech-i muharrer mesûrânın yedlerinde bulduğum cem‘an iki yüz dirhem gümüşü yedlerinden fi’l-hakīka tamâmen ahz u kabz mesfûrân Avram ve Salamon yedinde bâkī alacağım kalma[ma]ğla [95b] husûs-ı mezkûra müte‘allika âmme-i da‘vâdan her birinin zimmetini ibrâ ve iskāt eyledim dedikde, mezbûrân Yahûdiler dahi tasdîk edip kat‘-ı nizâ‘ etdikleri bi’l-iltimâs huzûr-ı âlîlerine i‘lâm olundu. El-emru li-men-lehü’l-emr. Fi’l-yevmi’s-sâmin aşer min-Muharremi’l-harâm li-sene isneteyn ve mie ve elf.