Rumeli Sadâreti Mahkemesi 272 Numaralı Sicil (H. 1171-1172/ M. 1758) cilt: 74, sayfa: 377 Hüküm no: 470 Orijinal metin no: [95b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çörekçi Ahmed Beşe’nin Uncu Agob aleyhindeki alacak davasında anlaşma sağlanması Ma‘rûz, Sâhib-i arzuhâl Çörekçi Ahmed Beşe b. Mustafa mahfil-i şer‘iyyâtda derûn-ı arzuhâlde mezkûrü’l-ism Uncu Agob v. Avanis zimmî muvâcehesinde mezbûr Agob zimmîye yedi seneden beri cihet-i karzdan un bahâsından ba‘de külli’l-hesâb zimmetimde olan altı yüz iki guruş deynime takās olmak üzere bundan akdem ayda beş guruşdan otuz altı ayda cem‘an yüz seksen guruş ve bilâ-devr-i şer‘î doksan guruş ki cem‘an iki yüz yetmiş guruş vermiş iken mezbûr Agob zimmî takās ve mahsûb-ı deyn-i mezkûr altı yüz iki guruşu işbu bin yüz yetmiş bir senesi Şevvâli’nin yirmi dördüncü günü bâb mahkemesinden verilen işbu i‘lâm-ı şer‘î mantûkunca benden tamâmen ahzetmiş idi. Hâlâ ber-vech-i muharrer mukaddemâ kendüye verdiğim meblağayn-i mezbûreyn cem‘an iki yüz yetmiş guruş zimmetinde kalıp hattâ mezbûr Agob zimmî i‘lâm-ı mezkûrdan sonra Molla Gürânî’de Çörekçi dükkânımda ber-vech-i muharrer iki yüz yetmiş guruşu i‘lâm-ı mezkûrdan mukaddem yedimden kabzını ve deyn-i mezkûrdan ziyâde olup zimmetinde bana deyni olduğunu ikrâr dahi etmekle hâlâ taleb ederim deyü ba‘de’d-da‘vâ ve’l-münâza‘a, müdde‘î-i mezbûr Amed Beşe ber-vech-i muharrer ziyâde iki yüz yetmiş guruş da‘vâsından merkūm Agob zimmî ile yüz elli yedi buçuk bedel-i makbûza sulh olup mâ‘adâsına ve târîh-i i‘lâma gelince ma‘lûmen ve mechûlen beynlerinden cereyân eden hukūk-ı sâireye müte‘allika âmme-i da‘vâdan mezbûr Agob ile oğulları Zeko ve Avanis’den her birinin zimmetlerini ibrâ ve iskāt edip mezbûr Agob zimmî dahi medfû‘u olan bedel-i sulh-ı mezbûr yüz elli yedi buçuk guruşa ve târîh-i i‘lâma gelince ma‘lûmen ve mechûlen hukūk-ı sâireye müte‘allika âmme-i da‘vâdan mezbûr Ahmed Beşe’nin zimmetini ibrâ ve iskāt [ve] her biri âharın ibrâsını dahi tasdîk ve kabûl etmeğin kat‘-ı nizâ‘ etdikleri bi’l-iltimâs huzûr-ı âlîlerine i‘lâm olundu. El-emru li-men-lehü’l-emr. Fî 20 min-Muharremi’l-harâm sene 1172.