Rumeli Sadâreti Mahkemesi 272 Numaralı Sicil (H. 1171-1172/ M. 1758) cilt: 74, sayfa: 385 Hüküm no: 482 Orijinal metin no: [98a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nikola v. Yuvan’ın elindeki iki aded mandayı, sahibi olan Fâtıma bt. İbrahim’e teslim etmesi Ma‘rûz, Vilâyet-i Rumeli’de Baba-yı atîk kasabası sâkinelerinden zâtı ta‘rîf-i şer‘î ile mu‘arrefe olan bâ‘ise-i i‘lâm Fâtıma bt. İbrahim mahfil-i şer‘iyyâtda Nikola v. Yuvan nâm zimmî muvâcehesinde mersûm Nikola zimmînin mülk-i müşterâsı olmak üzere yedinde olup işbu meclis-i şer‘de mevcûd ve mu‘âyene olunan bir çift mandaya müstahıkka çıkıp zikr olunan mandalar benim mülküm olup târîh-i i‘lâmdan iki ay mukaddem kasaba-i mezbûrede mülkümden zâyi‘ olmağla hâlâ mersûm Nikola zimmînin yedinde zafer bulmamla bi’l-istihkāk taleb ederim deyü ve mersûm Nikola cevâbında, sâlifü’l-beyân mandaları târîh-i i‘lâmdan kırk gün mukaddem Karagümrük Meydanı’nda müdde‘iye-i mezbûrenin karındaşı oğlu gāib ani’l-meclis Mahmud nâm kimesneden otuz iki guruş semen-i medfû‘a iştirâ etmiş idim deyü vaz‘-ı yedini ikrâr ve müdde‘iye-i mezbûrenin ber-vech-i muharrer müdde‘âsını ba‘de’l-inkâr müdde‘iye-i mezbûre Fâtıma ber-minvâl-i muharrer müdde‘âsını Hüseyin b. İbrahim ve Hasan Beşe b. Mustafa ve Ahmed b. Hüseyin nâm üç nefer kimesneler şehâdetleriyle muvâcehesinde vech-i şer‘î üzere ba‘de’l-isbât ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebiyle sâlifü’z-zikr mandaları müdde‘iye-i mezbûreye redd ü teslîm için mersûm Nikola’ya şer‘an tenbîh olunduğu huzûr-ı âlîlerine i‘lâm olundu. Fî 26 Muharrem sene 1172.