Rumeli Sadâreti Mahkemesi 272 Numaralı Sicil (H. 1171-1172/ M. 1758) cilt: 74, sayfa: 383 Hüküm no: 481 Orijinal metin no: [97b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mısır tüccarından Mehmed’in Mustafa b. Ahmed ve Kara Mehmed aleyhindeki alacak iddiasının reddedilmesi Bâ-mühr-i efendi, Ma‘rûz, Mısır tüccârından sâhib-i arzuhâl Mehmed derûn-ı arzuhâlde mezkûrü’l-ism es-Seyyid el-Hâc Mustafa b. Ahmed ve Kara el-Hâc Mehmed b. Abdullah ile meclis-i şer‘-i münîrde terâfu‘larında mezbûr es-Seyyid el-Hâc Mustafa yine bin yüz altmış bir senesi Şa‘bânı gurresinde yedinden iştirâ ve kabz eylediğim mikdârı beynimizde ma‘lûm pirinç ve kahve bahâsından zimmetinde deynim olan beş yüz elli zer-i mahbûbu tamâmen edâ ve yedine teslîm, ol dahi ahz u kabz edip deyn temessükümü taleb eylediğimde temessükün şerîkim ve vekîlim olup hâlâ ticâretle Mısır’da sâkin Kara el-Hâc Mehmed’dedir deyü cevâb vermekle bin yüz altmış üç senesi Ramazanı’nda ben dahi ticâretle Mısır’a vusûlümde mezbûr Kara el-Hâc Mehmed’i Mısır’da bulup temessükü taleb eylediğimde şerîkim mezbûr es-Seyyid el-Hâc Mustafa’ya beş yüz elli zer-i mahbûb deynini edâ etmeğin ben ahz u kabza vekîlim deyü malım ve mülküm olan dokuz yüz guruş kıymetli iki re’s Gürciye câriye ve iki yüz yetmiş beş guruş kıymetli bir tüfenk ve üç yüz otuz üç guruş kıymetli ma‘lûmü’l-mikdâr günlüğümü bi-gayr-ı hakkın ahz u kabz etmekle ber-vech-i muharrer me’hûzunu mezbûr Kara el-Hâc [98a] Mehmed’den hâlâ taleb ederim deyü da‘vâ ve mezbûr es-Seyyid el-Hâc Mustafa müdde‘î-i mezbûr Mehmed’den ber-minvâl-i muharrer Mısır’a gitmezden mukaddem meblağ-ı mezkûru ahzını inkâr ve mezbûr Kara el-Hâc Mehmed cevâbında zikr olunan câriyeler ve tüfenk ve günlüğü Mısır’da müdde‘î-i mezbûr Mehmed yedinden ahzını ikrâr, lâkin mezbûr Mehmed zikr olunan altmış üç senesinde Mısır’a gelip meblağ-ı mezkûr beş yüz elli zer-i mahbûb zimmetinde şerîkim mezbûr es-Seyyid el-Hâc Mustafa’ya cihet-i mezkûreden zimmetinde deyni olduğunu ve ben kabz ve istîfâya vekîli olduğumu ikrâr ve sâlifü’l-beyân câriyeler ve tüfenk ve günlüğü deyn-i mezkûru mukābelesinde şerîkim mezbûra vermek üzere bana vermekle ben dahi bi’l-vekâle ahzedip bu vechile temessükünü tahlîs ve ben şerîkim mezbûr es-Seyyid el-Hâc Mustafa’ya vermişdim. Hattâ mezbûr Mehmed zikr olunan câriyeler ve tüfenk ve günlüğü ber-vech-i muharrer ikrâr-ı deyn edip deyni için bana verdiğini bin yüz yetmiş bir senesi Rebî‘ülâhiri’nin evâhirinde ikrâr etmişdir deyü mezbûr es-Seyyid el-Hâc Mustafa’nın tasdîkiyle sâlifü’l-beyân yetmiş bir senesi Cumâdelûlâsı’nın onuncu günü ol vakitde ve hâlâ şer‘iyyâtî müderrisîn-i kirâmdan Ömer Efendi huzûrunda eylediğim def‘imi lede’t-tezkiye şehâdetleri makbûle olan Mısır tüccârından Konyalı Hüseyin Ağa b. Halil ve diğer Hüseyin Ağa b. Abdurrahman şehâdetleriyle mezbûr Mehmed muvâcehesinde vech-i şer‘î üzere isbât edip mûcebiyle müdde‘î-i mezbûr Mehmed husûs-ı mezkûr için bî-vech mu‘ârazadan men‘ olunmuş idi deyü takrîr-i meşrûhunu nâtık mezbûr es-Seyyid el-Hâc Mustafa ile ma‘an ibrâz eyledikleri bir kıt‘a i‘lâm-ı şer‘înin mazmûnu müdde‘î-i mezbûr Mehmed ikrâr ü i‘tirâf etmeğin müdde‘î-i mezbûr Mehmed bu def‘a husûs-ı mezkûr için kemâ fi’l-evvel bî-vech mu‘ârazadan men‘ olunduğu huzûr-ı âlîlerine i‘lâm olundu. Fî 22 Muharrem sene 1172.