Rumeli Sadâreti Mahkemesi 272 Numaralı Sicil (H. 1171-1172/ M. 1758) cilt: 74, sayfa: 388 Hüküm no: 487 Orijinal metin no: [99a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Halil Efendi’nin Numan Efendi ile naibi Ahmed aleyhindeki alacak davasında anlaşma sağlanması Ma‘rûz, Derûn-ı arzuhâlde mezkûrü’l-ism Halil Efendi b. İbrahim mahfil-i şer‘iyyâtda sâhib-i arzuhâl sâbıkā Bağdad kādısı mevâlî-i i‘zâmdan Numan Efendi b. Hasan b. Abdullah’ın tarafından zikri âtî sulh ve ibrâya vekîl olduğu Mahmud Ağa b. Mehmed ve Mustafa Beşe b. Osman şehâdetleriyle sâbit olan Hüseyin Ağa b. Süleyman muvâcehesinde müvekkil-i mezbûr Numan Efendi’nin abd-i memlûkü işbu hâzır bi’l-meclis Ahmed b. Abdullah târîh-i i‘lâmdan on bir sene mukaddem Niğde nâibi iken hizmetimde olmağla mahkemede dolabımda mevcûd mülküm olan dört yüz guruşumu bi-gayr-ı hakkın ahzedip hattâ işbu yetmiş iki senesi Muharremi’nin on yedinci günü Mahmudpaşa mahkemesinde mezbûr Ahmed’in ikrârını vech-i şer‘î üzere isbât edip işbu bir kıt‘a i‘lâm mantûkunca edâsıyla ilzâm ve habs olundukda mevlâsı müvekkil-i mezbûr merkūm Ahmed’in ikrâr-ı mezbûru dahi kerhen olmuşdur deyü beynlerinde ba‘de’l-münâza‘a müdde‘î-i mezbûr Halil Efendi da‘vâ-yı mezkûresinden vekîl-i mezbûr Hüseyin Ağa ile bâ-vesâtet-i muslihîn yüz kırk üç guruş bedel-i makbûza sulh olup mâ‘adâsına ve bi’l-cümle husûs-ı mezbûra müte‘allika âmme-i da‘vâdan mezbûr Ahmed’in ve mevlâsı müvekkil-i mûmâ-ileyhin zimmetlerini ibrâ-i âm ile ibrâ ve iskāt edip mezbûr Ahmed ile vekîl-i mezbûr dahi medfû‘u olan bedel-i sulh-ı mezbûr yüz kırk üç guruşa ve bi’l-cümle [99b] husûs-ı mezkûre müte‘allika âmme-i da‘vâdan bi’l-asâle ve bi’l-vekâle mezbûr Halil Efendi’nin zimmetini ibrâ ve iskāt edip her biri âharın ibrâsını dahi bi’l-asâle ve bi’l-vekâle kabûl etmeğin kat‘-ı nizâ‘ etdikleri huzûr-ı âlîlerine i‘lâm olundu. Fî 28 Muharrem sene 1172.