Rumeli Sadâreti Mahkemesi 272 Numaralı Sicil (H. 1171-1172/ M. 1758) cilt: 74, sayfa: 389 Hüküm no: 488 Orijinal metin no: [99b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Malatyalı Kürd Ahmed’i öldüren Kiro’nun diyet ödemesi Der-ma‘rûz, Fi’l-asl Malatya kazâsına tâbi‘ Kayışlı nâm karyeden olup medîne-i Üsküdar’a tâbi‘ Dudullu nâm karyede vâki‘ çiftlikde sâkin iken bundan akdem cerîhan fevt olan Kürd Ahmed b. Arslan b. Ali’nin verâseti li-ebeveyn er karındaşı sâhib-i arzuhâl İbrahim ile li-ebeveyn kız karındaşı Fâtıma’ya inhisârı tahakkukundan sonra mezbûr İbrahim ile zâtı ta‘rîf-i şer‘î ile mu‘arrefe olan mezbûre Fâtıma mahfil-i şer‘iyyâtda Kiro v. Yani nâm zimmî muvâcehesinde bin yüz yetmiş bir senesi Zilka‘desi’nin yirmi sekizinci günü ba‘de’l-asr karye-i mezbûre kurbünde Uzuntarla nâm mahâlde meşelik içinde karındaşımız ve mûrisimiz mezbûr Ahmed’in amden ve bi-gayr-ı hakkın mezbûr Kiro zimmî taş ile sağ tarafından boş böğrüne darb edip ve refîkleri gāibân ani’l-meclis Mano zimmî dahi orak ile sol elinin dört parmağını kat‘ edip ve Tanaş zimmî dahi odun ile beline darb etmekle karındaşımız ve mûrisimiz merkūm Ahmed mesfûr Kiro ve refîkleri gāibân-ı mezbûrân Mano ve Tanaş zimmîlerin ber-vech-i muharrer ma‘iyyetle def‘aten darb ü cerhlerinden müteessiren ol ânda fevt olup hattâ Zilhiccesi’nin sekizinci günü cenâzesini keşif esnâsında mezbûr Kiro zimmî karındaşınız mezbûr Ahmed’i ber-minvâl-i muharrer üçümüz ma‘iyyetle darb ve cerh ü katl eyledik deyü ikrâr ü i‘tirâf dahi etmekle hâlâ mûceb-i şer‘îsini mesfûr Kiro zimmîden taleb ederiz deyü her biri ba‘de’d-da‘vâ ve’l-inkâr müdde‘iyân-ı mezbûrân ber-vech-i muharrer müdde‘âlarını lede’t-tezkiye şehâdetleri makbûle olan Üsküdar’da Çinili Hamam kurbünde sâkin Hasan Beşe b. Mehmed ve Gümüş arayıcı odalarında sâkin Osman Beşe b. Ömer şehâdetleriyle muvâcehesinde vech-i şer‘î üzere isbât etmeğin mûcebiyle recül-i vâhidin diyet-i kâmilesi olan on bin dirhem fiddanın sülüsü olan üç bin üç yüz otuz üç dirhem ve bir sülüs dirhem fıddayı müdde‘iyân-ı mezbûrân İbrahim ve Fâtıma’ya vech-i şer‘î üzere edâ ve teslîme mesfûr Kiro zimmîye tenbîh olunduğu huzûr-ı âlîlerine i‘lâm olundu. Fî 27 Muharremi’l-harâm sene 1172