Rumeli Sadâreti Mahkemesi 272 Numaralı Sicil (H. 1171-1172/ M. 1758) cilt: 74, sayfa: 410 Hüküm no: 522 Orijinal metin no: [106b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Lütfullah ve Fethullah’a olan borcunu ödemesi hususunda Çukadar Ömer Ağa’ya tenbihte bulunulması Bâ-mühr-i efendi, Ma‘rûz, Keresteci tâifesinden el-Hâc Lütfullah ve şerîki sâhib-i arzuhâl el-Hâc Fethullah meclis-i şer‘-i münîrde derûn-ı arzuhâlde ismi mezkûr Çukadâr Ömer Ağa b. Yahya mahzarında mezbûr Ömer Ağa bundan akdem müceddeden binâ ve ihdâs eylediği İstanbul’da Hacce Hatun mahallesinde vâki‘ menzili için mâl-ı şirketimizden ve yedimizden iştirâ ve kabz eylediği kereste bahâsından hesâbını bin yüz altmış dokuz senesi Muharremi’l-harâmı gurresinde kendi ile beynimizde hesâb-ı sahîh ile hesâb eylediğimizde yedi yüz kırk dört guruşa bâliğ olup mezbûr Ömer Ağa meblağ-ı mezkûr cihet-i mezkûreden zimmetinde bize edâsı vâcib deyni olduğunu ikrâr-ı kat‘î ile ikrâr ve işbu deyn temessükünü yedimize i‘tâ eyledikden sonra meblağ-ı mezkûrun zahriye mantûkunca altmış guruşunu bize edâ ve teslîm, biz dahi ahzetmiş idik. Hâlâ bâkī kalan altı yüz seksen dört guruşu dahi mezbûr Ömer Ağa’dan taleb ederiz deyü da‘vâ ve mezbûr Ömer Ağa cevâbında müdde‘iyân-ı mezbûrândan kereste iştirâ ve kabzını ve ber-minvâl-i muharrer hesâb ve ikrârını i‘tirâf edip lâkin meblağ-ı bâkī-i mezkûrun elli guruşunu dahi mezbûrâna edâ etmiş idim deyü ol mikdârında eylediği def‘ini mezbûrân münkir ve mezbûr Ömer Ağa isbâtdan izhâr-ı acz edip mezbûrâna vech-i şer‘î üzere yemîn verilmekle mezbûr Ömer Ağa def‘-i mezkûruyla bilâ-beyyine-i âdile bî-vech mu‘ârazadan men‘ ve ikrârı mûcebince lâzım gelen meblağ-ı bâkī-i mezkûr altı yüz seksen dört guruşu müdde‘iyân-ı mezbûrân el-hâc Lütfullah ve el-Hâc Fethullah’a edâ ve teslîme mezbûr Ömer Ağa’ya tenbîh olunduğu huzûr-ı âlîlerine i‘lâm olundu. Fî 8 Saferi’l-hayr sene 1172.