|
Bab Mahkemesi 54 Numaralı Sicil (H. 1102 / M. 1691) cilt: 20, sayfa: 428 Hüküm no: 523 Orijinal metin no: [93b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
İstanbul hânelerinden kürekçi bedelinin tahsili
Akdâ kudâti’l-müslimîn evlâ vulâti’l-muvahhidîn ma‘denü’l-fazl ve’l-yakīn râfi‘ü ulûmi’ş-şerî‘ati ve’d-dîn, vârisu ulûmi’l-enbiyâ ve’l-mürselîn el-muhtas bi mezîdi inâyeti’l-meliki’l-mu‘în Mevlânâ İstanbul kadısı -zîdet fezâ’iluhû- tevkī‘-i refî‘-i hümâyûn vâsıl olıcak ma‘lûm ola ki, Hazîne-i âmirem defterleri mûcebince İstanbul Kazâsı’nın bin beş yüz kırk altı avârız hâneleri olup, bin yüz iki senesine mahsûb olmak üzre kürekçi bedelleri cem‘ ve tahsîl olunmak lâzım ve mühim olmağın, Hazîne-i âmirem’den ihrâc olunan mühürlü ve nişânlı mevkūfât defteri sûreti mûcebince cem‘ ve tahsîl ettirilmek emrim olmuşdur. Buyurdum ki, hükm-i şerîfimle vardıkda, bu bâbda sâdır olan emrim üzre amel edip, dahi kazâ-i mezbûrun ol mikdâr avârız hânelerinin târih-i mezbûra mahsûb olmak üzre her bir hânelerinden dörder yüz yirmi dokuzar akçe hesâbı üzre kürekçi bedeli avârızların irsâl olunan mühürlü ve nişânlı mevkūfât defteri sûreti mûcebince vakt ü zamânıyla cem‘ ve tahsîl ettirilip hilâf-ı emr ve defter kimesneye te‘allül ve muhâlefet ettirmeyesin ve bundan mâ‘adâ mübâşirin cihet-i ma‘âşı için her bir hânelerinden onar akçe vech-i ma‘âş ve yine her bir hânesinden on beş akçe dahi harc-ı Tersâne aldırılıp, bundan ziyâde bir akçe ve bir habbe alınmaya ve aldırmayasın ve hîn-i tahsîlde mîrî için alınan akçenin her yüz on akçesinden bir sülüsü esedî guruş olmak üzre sülüsü altın guruş ve sülüsü hâlisü’l-ayâr Mısrî para ve sülüsü tuğrâ-yı hümâyûnla meskûk mangır ve mangırın dahi her yüz yirmisin bir esedî hesâbı üzre aldırılıp, ziyâde ve noksan aldırmayasın ki defterden ve noksan hâneden ve hilâf-ı emr ve defter zulm ve te‘addîden ihtirâz eyleyesiz, şöyle bilesiz, alâmet-i şerîfe i‘timâd kılasız. Tahrîren fi’l-yevmi’l-ışrîn min şehri Cumâdelâhire li sene isneteyn ve mi’e ve elf. Be-makām-ı Kostantıniyye el-mahrûse.
|