.:: İstanbul Kadı Sicilleri ::.


Bab Mahkemesi 54 Numaralı Sicil (H. 1102 / M. 1691)
cilt: 20, sayfa: 428
Hüküm no: 522
Orijinal metin no: [93a-2]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Hüseyin Ağa b. Hasan’ın 10. Yeniçeri Ağa Bölüğü Vakfı’na borcu olduğu

Mahmiye-i İstanbul’da Sofular mahallesi sükkânından Hüseyin Ağa b. Hasan meclis-i şer‘-i enverde, Dergâh-ı âlî yeniçerilerinin Onuncu Ağa Bölüğü’ne mahsûs oda neferâtının mühimmâtı için mevkūf nukūda bi’l-fi‘il mütevellî olan işbu râfi‘ü’l-kitâb Hüseyin Çelebi b. Ali mahzarında ikrâr-ı tâm ve takrîr-i kelâm edip, mütevellî-i mezbûr Hüseyin Çelebi’nin yedinde olan mâl-ı vakf-ı mezbûrdan istidâne ve karz eylediğim nakid bin beş yüz yirmi iki guruş ve semeni târih-i kitâbdan bir sene tamâmına değin mev‘ûd ve müeccel olmak üzre iştirâ ve kabz eylediğim beynimizde ma‘lûm samur kürk bahâsından dahi iki yüz yirmi sekiz guruş ki, cem‘an cânib-i vakfa lâzımü’l-edâ ve vâcibü’l-kazâ ve benim zimmetimde bin yedi yüz elli guruş deynim olmağla eşyâ-yı memlûkemden işbu bir cild Câmi‘u’s-sagīr kitâbı ve iki incili tarbuş ve bir çift altından masnû‘ bilezik ve bir çift zümrüd küpe ve dört dizi incili askı ile ve bir mercân tesbih ve bir Mısır yapağı ve iki çift Mısır üzengisi ve dört sîm mücevher ve beş sîm kemer raht ve üç haydarî raht ve iki sîm beledî sîm kılıç ve def‘a üç sîm kılıç ve dört sîm gaddâre ve bir çift sîm yan hıştları ve yaldızlı sîm reşme ve bir sîm yılan ve bir sırmalı kırmızı zelyoş? ve bir Mısır donanması altın kakmalı tüfengi mütevellî-i mezbûra rehin vaz‘ ve teslîm, ol dahi ber vech-i muharrer üzre irtihân ve tesellüm ve kabûl eylediğinden sonra eğer müddet-i mezbûre tamâmında edâ-i deyn [ile] fekk-i rehin müyesser olmazsa rihân-ı mezkûreyi semen-i misli ile bey‘ ve kabz-ı semen ve semeninden deyn-i mezbûru mütevellî-i mezbûra edâya fazla kalırsa kendiye îsâle ve husûs-ı mezkûr mütevakkıf olduğu umûrun küllîsine işbu hâzır bi’l-meclis Hasan Beşe b. Abdülkādir küllemâ azeltüke fe-ente vekîli mazmûn-ı münîf-i üzre azl ve in‘izâlden masûne vekâlet-i devriye ile vekîl ve nâib-i menâb nasb ve ta‘yîn edip, ol dahi vekâlet-i mezkûreyi kabûl ve merâsimini edâya ta‘ahhüd eyledi dedikde, gıbbe’t-tasdîki’l-vicâhî mahmiye-i mezbûre ( ) mahallesinde sâkin İvaz b. Mehmed Efendi eğer fîmâ ba‘d emlâk-i mezkûrun semenleri deyn-i mezbûra vefâ etmeyip mezbûr (...) Ağa’nın zimmetinde kalırsa, ben ol fazla kalan deyne kefîl oldum dedikde, mâ-vaka‘a ketb olundu. Fi’l-yevmi’s-sânî min Recebi’l-mürecceb sene 1102.


Şuhûdü’l-hâl: İslâm Ağa b. Veliyyüddin, Berber Ali Efendi b. Mustafa.