|
Bab Mahkemesi 54 Numaralı Sicil (H. 1102 / M. 1691) cilt: 20, sayfa: 430 Hüküm no: 526 Orijinal metin no: [94a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Sefer için İstanbul’dan aynî ordu ihrac olunması
Akdâ kudâti’l-müslimîn evlâ vulâti’l-muvahhidîn ma‘denü’l-fazl ve’l-yakīn vârisu ulûmi’l-enbiyâ ve’l-mürselîn râfi‘ü a‘lâmi’ş-şerî‘ati ve’d-dîn el-muhtas bi mezîdi inâyeti’l-meliki’l-mu‘în Mevlânâ İstanbul Kadısı -zîdet fezâ’iluhû- tevkī‘-i refî‘-i hümâyûn vâsıl olıcak ma‘lûm ola ki, inşâ’allâhü te‘âlâ işbu sene-i mübârekede küffâr-ı dûzah-karâr üzerine sefer-i hümâyûnum muhakkak olmağın, sefer-i hümâyûnuma me’mûr olan asâkir-i İslâm için İstanbul şehrinden mu‘tâd-ı kadîm üzre aynî ordu ihrâcı olunmak lâzım ve mühim olmağla, mübâşir yedine verilen mühürlü ve nişânlı mevkūfât defteri sûreti mûcebince ekmekçiyân ve kasabân ve bakkālân hırfetlerin bütün ihrâc ve mâ‘adâ olan esnâf sene-i sâbıkada ihrâc olunduğu üzre ber vech-i münâsafe ihrâc ve çadırları mükemmel levâzımları ile hâzır ve âmâde ettirilmek üzre arz ve telhîs olundukda, sene-i sâbık mûcebince ihrâc olunmak bâbında fermân-ı âlîşânım sâdır olmuşdur. Buyurdum ki, hükm-i şerîfimle vardıkda bu bâbda sâdır olan emrim üzre amel edip dahi vech-i meşrûh üzre sefer-i hümâyûnuma me’mûr olan asâkir-i İslâm için İstanbul şehrinden sene-i sâbık mûcebince ihrâcı lâzım gelen aynî orduyu mübâşirleri yedine verilen mühürlü ve nişânlı mevkūfât defter-i hümâyûn mûcebince ekmekçiyân ve bakkālân hırfetlerinden bütün ihrâc ve mâ‘adâ olan esnâf sene-i sâbıkada ihrâc olunduğu üzre ber vech-i münâsafe ihrâc ve mükemmel levâzımlarıyla vakt ü zemânıyla hâzır [ve] âmâde ettirmekde mücidd ü sâ‘î olasız, şöyle bilesiz, alâmet-i şerîfe i‘timâd kılasız. Tahrîren fi’l-yevmi’s-sânî aşer min şehri Cumâdelâhire li sene isneteyn ve mi’e ve elf. Be-makām-ı Kostantıniyye el-mahrûse. Defter-i ihrâc-kerden-i esnâf-ı mezkûrîn an-cânib-i İstanbul berây-ı sefer-i hümâyûn el-vâki‘ fî sene [1]102 ber-mûceb-i defter-i Hazîne-i Âmire, Kazâ-i İstanbul Hırfet-i şimşirgerân Hayme Aded 1 Hırfet-i kemângerân Hayme Aded 1 Hırfet-i semerciyân Hayme Aded 1,5 Hırfet-i sarrâcân Hayme Aded 2 Hırfet-i eskiciyân Hayme Aded 2 Hırfet-i nalbandân Hayme Aded 2 Hırfet-i mumcuyân Hayme Aded 1 Hırfet-i Başcıyân Hayme Aded 1 Hırfet-i nalçacıyân Hayme Aded 2 Hırfet-i attârân Hayme Aded 2 Hırfet-i bakkālân Hayme Aded 4 Hırfet-i mûytâbân Hayme Aded 2 Hırfet-i Aşcıyân Hayme Aded 1 Hırfet-i hayyâtân Hayme Aded 1 Hırfet-i haffâfân Hayme Aded 4 Hırfet-i kasabân Hayme Aded 2 Hırfet-i çadırcıyân Hayme Aded 4 Hırfet-i kalaycıyân Hayme Aded 4 Hırfet-i habbâzân Hayme Aded 2 Yekûn-ı Hırfet Aded 19 Tahrîren fî 12 C[umâdelâhire] sene [1]102.
|