Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 79 Hüküm no: 9 Orijinal metin no: [2b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali b. Mustafa’nın vârislerinden kızı Hatice’nin vârislere intikal eden evdeki hissesini İsmail Ağa b. Ali’ye sattığı Mahrûse-i Edirne’de Kınalıçelebi? Mahallesi’nde sâkin iken bundan akdem vefât eden Ali b. Mustafa nâm kimesnenin verâseti zevce-i metrûkesi Hemrâh bt. Abdullah ile sulbî kebîr oğulları el-Hâc Mustafa ve Halil ve İsmail nâm kimesneler ile sulbiye kebîre kızları Hadice ve İsmihan ve Afife nâm hatunlara münhasıra olduğu şer‘an zâhir ve müte‘ayyin oldukdan sonra mezkûre Hadice’nin zevci ve tarafından husûs-ı âti’z-zikre vekîl olduğu zât-ı mezbûreyi ma‘rifet-i şer‘iyye ile ârifân Hasan b. Mehmed ve Hallâc Mehmed Çelebi b. Ramazan nâm kimesneler şehâdetleriyle şer‘an sâbit olan es-Seyyid Halil Ağa b. Burhâneddin nâm kimesne meclis-i şer‘-i şerîf-i enverde müvekkile-i mezbûre Hatice’nin karındaşı işbu bâ‘isü’l-kitâb İsmail Ağa b. Ali mahzarında bi’l-vekâle ikrâr-ı tâm ve takrîr-i kelâm edip tereke-i müteveffâ-i mezbûrdan olup mahalle-i mezbûrede vâki‘ bir tarafdan Hadice Hatun mülkü ve bir tarafdan Peykhan Hatun mülkü ve iki tarafdan tarîk-i âm ile mahdûd hâriciyede iki bâb fevkānî oda ve bir sofa ve iki bâb tahtânî oda ve iki ahır ve iki kenîf ve havlu ve dâhiliyede iki bâb tahtânî oda ve bir sagīr tahtânî oda ve iki sofa ve bir sagīr köşk ve su kuyusu ve iki kenîf ve iki mahzeni ve bir matbah ve bir fırın ve bir mikdâr havluyu müştemil mülk menzilden müvekkilem mezbûreye isâbet eden hisse-i şer‘iyye-i şâyi‘asını bi-cümleti’t-tevâbi‘ ve’l-levâhık tarafeynden îcâb ve kabûlü hâvî bey‘-i bâtt-ı sahîh-i şer‘î ile elli guruşa mezbûr İsmail Ağa’ya bi’l-vekâle bey‘ ve temlîk eylediğimde ol dahi ber-vech-i muharrer iştirâ ve temellük ve kabûl eylediğinden sonra semeni olan meblağ-ı mezbûr elli guruşu mezbûr İsmail Ağa yedinden bi’l-vekâle ahz u kabz edip mebî‘-i mezkûru mahallinde zabta mezbûr İsmail Ağa’yı taslît eyledim baʻde’l-yevm müvekkilem mezbûre Hatice’nin menzil-i mezbûrda olan hisse-i şâyi‘ası mezbûr İsmail Ağa’nın mülk-i müşterâsıdır keyfe mâ yeşâ ve yehtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî-gurreti şehri Rebîʻülâhir sene 1121 Şuhûdü’l-hâl: Fazlı Ağa b. ( ) ez-Za‘îm, Ömer Ağa b. Ahmed, Çukadâr Osman b. ( ), Mustafa Çelebi b. Şa‘ban, Süleyman b. Abdullah, Hasan b. Abdullah, Za‘îm Mustafa Ağa an-Edirne, Kasım Ağa b. Mehmed, Mustafa Ağa Ağa-yı Sadr-ı âlî, Cevâhirci Ahmed Ağa an-Narlıkapı ve gayruhum mine’l-huzzâr.