Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 79 Hüküm no: 8 Orijinal metin no: [2b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Çelebi b. Ali’nin Molla Şeref Vakfı’dan boşandığı hanımı Emetullah bt. Hacı Mustafa’ya sattığı dükkan bedelinden alacak iddiasının satışın usûlsüz olduğundan reddedildiği Mahmiye-i İstanbul’da Öksüzce Mahallesi’nde sâkin Ahmed Çelebi b. Ali nâm kimesne mahfil-i kazâda zevce-i sâbıkāsı işbu râfi‘atü’l-vesîka Emetullah bt. el-Hâc Mustafa nâm hatun muvâcehesinde üzerine da‘vâ ve takrîr-i kelâm edip Molla Şeref Vakfı’ndan icâreteyn-i ma‘lûmeteyn ile taht-ı tasarrufumda olup mahmiye-i mezbûrede Kaliçeciler Köşkü sûkunda vâki‘ ma‘lûmü’l-hudûd ve’l-cîrân iki kepenk berber dükkânımı târih-i kitâbdan bir buçuk sene mukaddem bâ-ma‘rifet-i mütevellî elli guruş bedel mukābelesinde mezbûre Emetullah Hatun’a ferağ ve tefvîz ol dahi tefevvüz ve kabûl ettiğinden sonra bedel-i merkūmun yirmi beş guruşunu hîn-i ferağda bana def‘ u teslîm ben dahi yedinden ahz u kabz edip bedel-i merkūmdan yirmi beş guruşu dahi zimmetinde bâkī kalmağın hâlâ suâl olunup bedel-i bâkī-i merkūm yirmi beş guruşu bana teslîme tenbîh olunmak matlûbumdur dedikde müdde‘î-i mezbûrun takrîr-i meşrûhu üzere husûs-ı vakfda izn-i mütevellî ile baʻde’l-ferağ bedel-i mezkûr da‘vâsı meşrû‘a olmayıp mezbûr Emetullah Hatun’a şer‘an suâl dahi tevcîh etmemeğin müdde‘î-i mezbûr bî-vech mu‘ârazadan men‘-birle mâ-vaka‘a bi’t-taleb ketb olundu. Fî 3 min-şehri Rebîʻülâhir sene 1121 Şuhûdü’l-hâl: Mustafa b. Şa‘ban, Ali b. İvaz, Ali b. Abdullah, Hasan b. Mustafa, Ali b. Bâli.