Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 80 Hüküm no: 11 Orijinal metin no: [3a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Afife bt. Derviş Ömer’in bülûğa erdiğinde nikâhı fesih talebi Mahmiye-i İstanbul’da Sarı Nasuh Mahallesi’nde sâkine zâtı es-Seyyid Hasan Efendi b. Mehmed Efendi ve Mehmed Çelebi b. Ali ma‘rifetleriyle mu‘arrefe olan Afife bt. Derviş Ömer meclis-i şer‘-i şerîf-i enverde takrîr-i kelâm ve tâʻbir ani’l-merâm edip bundan akdem rızâen pederim es-Seyyid Hasan Efendi beni gāib ani’l-meclis Mehmed Çelebi b. Salih nâm kimesneye tezvîc ve inkâh eylemişidi hâlâ ben târih-i kitâb günü kuşluk vaktinde dem-i hayzımı irâet edip bâliğa olduğum hînde nefsimi ihtiyâr ve nikâhımı fesh murâd etmemle ol hînde bülûğumu ve nefsimi ihtiyâr eylediğim işbu hâzır bi’l-meclis İbrahim Efendi b. Abdurrahman ve Mehmed Çelebi b. Mehmed nâm kimesneleri işhâd eyledim suâl olunup takrîrleri tahrîr ve yedime i‘tâ olunmak matlûbumdur dedikde gıbbe’s-suâl mezbûr İbrahim Efendi ve Mehmed Çelebi cevâblarında fi’l-vâki‘ işbu mezbûre Afife târih-i kitâb günü kuşluk vaktinde sâkine olduğu menzilde dem-i hayzımı görüp nefsimi ihtiyâr eyledim zevcim gāib-i mezbûrdan fesh murâd ederim deyü ol hînde bizi işhâd eyledi biz bu husûsa bu vech üzere şâhidleriz şehâdet dahi ederiz deyü her biri <> alâ-tarîkı’ş-şehâde haber verip lâkin nikâh feshi zevci gāib-i mezbûr huzûruna tevkīf olunmağın mâ-vaka‘a bi’t-taleb ketb olundu. Fî 27 şehri Rebîʻülâhir sene 1121 Şuhûdü’l-hâl: Mustafa b. Şa‘ban, Ali Çelebi b. İvaz, Ali b. Bâli, Hasan b. Mustafa, Abdullah b. Abdullah ve gayruhum mine’l-huzzâr.