Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 81 Hüküm no: 12 Orijinal metin no: [3a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yavaşçaşahin Mahallesi’nde Hacı Ali b. Ebûbekir’in mülkü olarak zaptettiği evin Hoca Sinan Vakfı’na ait olduğunun tescil edildiği Husûs-ı âti’l-beyânın mahallinde ketb ü tahrîr ve fasl u hasmıʼçün fermân-ı âlî sâdır olmağın imtisâlen-leh bizzât bu fakīr hâssa mi‘mârlarından Dede Mehmed Halîfe b. İshak ile mahmiye-i İstanbul’da Yavaşça Şahin Mahallesi’nde vâki‘ zikri âtî mahall-i nizâ‘ olan menzil üzerine varıp zeyl-i kitâbda mastûrü’l-esâmî Müslimîn huzûrunda akd-i meclis-i şer‘-i nebevî eyledikde Samanveren demekle ma‘rûf merhûm Hoca Sinan Vakfı’nın bi’l-fi‘il mütevellîsi olan işbu sâhibü’l-kitâb Ahmed Ağa b. Sadreddin nâm kimesne meclis-i ma‘kūd-ı mezkûrda menzil-i câi’z-zikre vâzı‘u’l-yedi olan el-Hâc Ali b. Ebûbekir mahzarında üzerine da‘vâ ve takrîr-i kelâm edip mahalle-i mezbûrede vâki‘ bir tarafdan Hacı Ca‘fer mülkü ve bir tarafdan Kaliçeci Hasan Vakfı ve bir tarafdan tarîk-i hâs ve bir tarafdan tarîk-i âm ile mahdûd mi‘mâr-ı mezbûr mesâhasıyla tûlen ve arzen bi-hesâb-ı terbî‘î yüz on dört zirâ‘ arsa ve kârgîr zîr-i zemîni ve hâlâ sonradan mebnî bazı ebniyeyi müştemil olan menzil bin doksan dört târihinde vâki‘ olan harîkden mukaddem üç tabaka odaları müştemil olduğu hâlde Kâtib-i Kumru İbrahim Efendi nâm kimesnenin mülkü ve yine Mazlum Reis demekle ma‘rûf Mustafa Efendi, Maktûl Mustafa Paşa’nın mektûbcusu iken bin doksan senesinde Samanveren Mahallesi’nde vâki‘ Şamlı Mehmed Kapudan nâm kimesneden tefevvüz edip icâre-i mu‘accele-i ma‘lûme ve yevmî üç akçe icâre-i müeccele ile merkūm Samanveren Hoca Sinan Vakfı’ndan mutasarrıf olduğu menzil ile bi’l-izni’ş-şer‘î ve bâ-fermân-ı âlî istibdâl edip Samanveren Mahallesi’nde olan vakıf menzil-i mezkûr mülk ve işbu Yavaşça Şahin Mahallesi’nde hudûd-ı mezkûr ile mahdûd olup kable’l-harîk üç tabaka odaları ve bir kârgîr zîr-i zemîni müştemil köşede vâki‘ işbu mahall-i nizâ‘ olan menzil zikri mürûr eden menzile bedel olmak üzere vakıf olup vakfiyetine hükm-i hâkim lâhık olmuş iken mezbûr Hacı Ali mülkü olmak üzere zabt u tasarruf eder suâl olunup menzil-i mezbûrun vakfiyetine ve zamân-ı tasarrufunda vakfa âid ve lâzım olan icâresini edâya mezbûr Hacı Ali’ye tenbîh olunmak matlûbumdur dedikde gıbbe’s-suâl mezbûr Hacı Ali cevâbında menzil-i mahdûd-ı mezkûra mülkü olmak üzere vaz‘-ı yedini ikrâr lâkin ber-vech-i muharrer vakfiyetini inkâr edicek müdde‘î-i mezbûr Ahmed Ağa’dan müdde‘âsını mübeyyine beyyine taleb olundukda udûl-i ahrâr-ı ricâlden Samanveren Mahallesi sükkânından Tâcir Osman Çelebi b. Ahmed ve Kişizâde Mehmed Çelebi b. Hasan ve Kaşıkçı Hüseyin Beşe b. Abdullah ve İskender Çelebi b. Osman ve el-Hâc Mustafa b. Ahmed ve Altıpoğaça Mahallesi sükkânından Ahmed b. Mustafa ve Hasan b. İbrahim nâm kimesneler li-ecli’ş-şehâde meclis-i şer‘a hâzirûn olup istişhâd olunduklarında fi’l-hakīka işbu Yavaşça Şahin Mahallesi’nde vâki‘ bir tarafdan Hacı Ca‘fer mülkü ve bir tarafdan Kaliçeci Hasan Vakfı ve bir tarafdan tarîk-i hâs ve bir tarafdan tarîk-i âm ile mahdûd olup mi‘mâr-ı mezbûr mesâhasında yüz on dört zirâ‘ arsa ve kârgîr zîr-i zemîni ve hâlâ sonradan mebnî baʻzı ebniyeyi müştemil olup münâza‘un-fîh olan menzil kable’l-harîk üç tabaka odaları ve yine mârru’z--zikr kârgîr zîr-i zemîni muhtevî olduğu hâlde Kâtib-i Kumru İbrahim Efendi’nin mülkü iken mezbûr Reis Mustafa Efendi hayâtında Maktûl Mustafa Paşa’nın mektûbcusu iken bin doksan senesinde Samanveren Mahallesi’nde vâki‘ Şamlı Mehmed Kapudan nâm kimesneden tefevvüz edip icâre-i mu‘accele-i ma‘lûme ve yevmî üç akçe icâre-i müeccele ile merkūm Samanveren Hoca Sinan Vakfı’ndan mutasarrıf olduğu menzil ile bi’l-izni’ş-şer‘î ve bâ-fermân-ı âlî istibdâl edip Samanveren Mahallesi’nde olan vakıf menzil-i mezbûr mülk ve işbu Yavaşça Şahin Mahallesi’nde hudûd-ı mezkûr ile mahdûd olup kable’l-harîk üç tabaka odaları ve bir kârgîr zîr-i zemîni müştemil köşede vâki‘ işbu mahall-i nizâ‘ olan menzil bi’l-izni’ş-şer‘î zikr olunan menzile bedel olmak üzere vakıf olup vakfiyetine hükm-i hâkim lâhık olmuşdur biz bu husûsa bu minvâl-i muharrer üzere şâhidleriz şehâdet dahi ederiz deyü her biri edâ-yı şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebince zikri mürûr eden Yavaşça Şahin Mahallesi’nde köşede vâki‘ menzil-i mahdûd-ı mezkûrun vakfiyetine hüküm-birle mâ-vaka‘a bi’t-taleb ketb olundu. Fî 13 min-şehri Rebî‘ülevvel sene 1121 Şuhûdü’l-hâl: Mehmed Efendi b. Mustafa, İbrahim Çelebi b. Mehmed, Mansurzâde İbrahim Çelebi b. el-Hâc Ali, Mehmed b. Ali, Mustafa b. Mehmed, Mehmed Çelebi b. Mustafa, Mustafa b. İbrahim, Mehmed b. Abdullah, el-Hâc Mustafa b. Mehmed, İbrahim Çelebi b. Mustafa, Hacı Hasan b. Mustafa, Hacı Musa b. Ebûbekir, Mehmed b. Mustafa, Musa Beşe b. Mustafa, Mehmed b. Musa, Berber Hacı Mustafa b. Mehmed ve gayruhum mine’l-huzzâr.