Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 85 Hüküm no: 17 Orijinal metin no: [4a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Krazos v. Anderyas’ın borçlusu olduğu Krako v. Norsis’e ödemeyi geciktirdiği iki aylık taksiti ödemesi Mahmiye-i İstanbul’da ( ) Mahallesi’nde sâkin işbu râfi‘u’s-sifr Krako v. Norsis nâm zimmî meclis-i şer‘-i şerîf-i enverde Krazos v. Anderyas nâm zimmî muvâcehesinde üzerine da‘vâ ve takrîr-i kelâm edip mezbûr Krazos zimmetinde cihet-i karz-ı şer‘îden kırk guruş hakkım olup meblağ-ı mezbûru hâlâ def‘aten edâya iktidârı olmamağla târih-i kitâb şehrinden iki buçuk ay mukaddem her otuz gün tamamında bana altışar guruş verip meblağ-ı mezbûru târih-i mezbûrdan altı ay ve yirmi gün tamamına değin tamamen edâ etmek üzere te’cîl ve taksît edip ol dahi kabûl etmişidi hâlâ târih-i kitâb şehrine gelince iki buçuk ayda müctemi‘ olan on beş guruşu mezbûr Krazos’dan taleb eylediğimde bana edâdan imtinâ‘ eder suâl olunup alıverilmesi matlûbumdur dedikde gıbbe’s-suâl mezbûr Krazos cevâbında fi’l-vâki‘ kaziyye müdde‘î-i mezbûrun takrîr-i meşrûhu üzere olup taksît-i mezbûrdan ber-vech-i muharrer üzerine on beş guruş müctemi‘ olduğunu ikrâr u i‘tirâf etmeğin mûcebiyle meblağ-ı mezbûr on beş guruşu müdde‘î-i mezbûra edâ ve teslîme mezbûr Krazos’a tenbîh-birle mâ-vaka‘a bi’t-taleb ketb olundu. Fî 2 min-şehri Rebîʻülâhir sene 1121 Şuhûdü’l-hâl: Mustafa Çelebi b. Şa‘ban, Ali Çelebi b. İvaz, Hasan Çelebi b. Abdullah, Hasan Çelebi b. Mustafa, Ali Çelebi b. Bâli ve gayruhum mine’l-huzzâr.