Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 95 Hüküm no: 31 Orijinal metin no: [5b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dergâh-ı âlî Kırk İkinci Bölüğü Oda Vakfı’na borcu olan Dimitri v. Anton v. Yani’nin borcunu vekili olan Kostantin v. Hristo’nun ödemesi Dergâh-ı [âlî] yeniçelerinin kırk ikinci bölüğüne mahsûs oda vakfına bi’l-fi‘il mütevellî olan işbu râfi‘u’l-kitâb el-Hâc Mehmed Beşe b. İbrahim nâm kimesne mahfil-i kazâda mahrûse-i Galata’da Beyoğlu Mahallesi ahâlîsinden olup mahmiye-i İstanbul’da Sipâhîler [Sipâhî] sûkunda vâki‘ Nişli Ali Ağa dükkânında müsteciri ve dikilmiş çuka yapağı olan gāib ani’l-beled Dimitri v. Anton v. Yani nâm zimmî tarafından düyûn-ı müsbitesini edâya vekîli olduğu yedinde mazmûnu müsbet hüccet ile sâbit olan mahmiye-i mezbûrede Çadırcı [Ahmed] Mahallesi’nde sâkin Kostantin v. Hristo nâm zimmî muvâcehesinde bi’t-tevliye üzerine da‘vâ ve takrîr-i kelâm edip gāib-i merkūm Dimitri’ye bin yüz on dokuz Receb’i gurresinde mâl-ı vakf-ı mezbûrdan yüz beş guruş idâne ve teslîm ve semeni târih-i mezbûrdan bir sene tamamına değin müeccel olmak üzere beynimizde ma‘lûm londrine çukayı dahi mezbûra on beş guruşa bi’t-tevliye bey‘ ve teslîm ol dahi istidâne ve kabz ve iştirâ ve tesellüm etmekle suâl olunup gāib-i mezbûrun mâlından edâ etmek üzere vekîl-i merkūma tenbîh olunmak matlûbumdur dedikde gıbbe’s-suâl merkūm Kostantin cevâbında fi’l-hakīka vekâlet-i mezkûresini ikrâr lâkin husûs-ı merkūmu inkâr edicek mütevellî-i mezbûrdan müdde‘âsını mübeyyine beyyine taleb olundukda udûl-i Müslimînden olup mahmiye-i mezbûrede Ayazmakapısı dâhilinde sâkin el-Hâc Ahmed Ağa b. Halil ile Abdi Subaşı Mahallesi’nde sâkin olup Sipâhî sûkunda çukacı olan Yanaki v. Dimitri nâm zimmî li-ecli’ş-şehâde mahfil-i kazâya hâzırân olup isre’l-istişhâd fi’l-hakīka mütevellî-i mezbûr el-Hâc Mehmed Beşe bin yüz on dokuz senesi Recebi’l-mürecceb’i gurresinde mütevellîsi olduğu oda-i mezkûre mâlından bi’t-tevliye gāib-i merkūm Dimitri v. Anton v. Yani nâm zimmîye yüz beş guruş idâne ve teslîm ve beynlerinde ma‘lûm londrine çukayı târih-i mezbûrdan bir seneye değin müeccel olmak üzere bi’t-tevliye on beş guruşa bey‘ ve teslîm ol dahi bizim huzûrumuda istidâne ve kabz ve iştirâ ve tesellüm eyledi biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebince baʻde’l-hükm meblağ-ı merkūm cem‘an yüz yirmi guruşu mütevellî-i mezbûra bi’l-vekâle edâya vekîl-i merkūm Kostantin’e tenbîh-birle mâ-vaka‘a bi’t-taleb ketb olundu. Fî-gurreti Muharremi’l-harâm sene 1121 Şuhûdü’l-hâl: el-Hâc Mustafa Efendi Kethüdâ-yı hazret-i efendi, el-Hâc Mehmed b. ( ), Süleyman Ağa b. ( ), Mehmed Çelebi b ( )