Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 96 Hüküm no: 32 Orijinal metin no: [5b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Lambo v. Dimitri’nin alacaklısı olduğu ortağı Dimitri v. Anton v. Yani’nin borcunu vekili olan Kostantin v. Hristo’nun ödemesi Mahmiye-i İstanbul’da Sipâhî sûku ahâlîsinden olup Fener dâhilinde sâkin işbu râfi‘u’s-sifr Hürmüz v. Yani nâm zimmî mahfil-i kazâda mahrûse-i Galata’da Beyoğlu Mahallesi ahâlîsinden olup mahmiye-i mezbûrede Sipâhî sûkunda vâki‘ Nişli Ali Ağa dükkânında müsteciri ve dikilmiş çuka yapağı olan gāib ani’l-beled Dimitri v. Anton v. Yani nâm zimmî tarafından düyûn-ı müsbitesini edâya vekîl olduğu yedinde mazmûnu müsbet hüccet ile sâbit olan mahmiye-i mezbûrede Çadırcı Ahmed Mahallesi’nde sâkin Kostantin v. Hristo nâm zimmî mahzarında gāib-i merkūmun şerîki Lambo v. Dimitri hâzır olduğu hâlde üzerine da‘vâ ve takrîr-i kelâm edip gāib-i merkūm Dimitri’ye târih-i kitâbdan beş ay mukaddem Şa‘bân-ı şerîf evâilinde her pasdavı yüz ikişer guruşa olmak üzere levni ve zirâ‘ı beynimizde ma‘lûm on beş pasdav çukamı bin beş yüz otuz guruşa bey‘ ve teslîm ol dahi ber-vech-i muharrer iştirâ ve tesellüm edip kable’l-edâ firâr ve gaybet etmekle vekîl-i mezbûra suâl olunup müvekkilinin mâlından bi’l-vekâle edâya tenbîh olunmak matlûbumdur dedikde gıbbe’s-suâl merkūm Kostantin ber-vech-i muharrer vekâletini ikrâr lâkin husûs-ı mezbûru inkâr edicek müdde‘î-i merkūmdan müdde‘âsını mübeyyine beyyine taleb olundukda [6a] mahmiye-i mezbûrede Mirâhor Mahallesi’nde sâkin olup gāib-i merkūmun dükkânı kurbünde tüccârdan olan Anton v. Yani nâm zimmî ile Pîrî Paşa’da sâkin Yako v. Haim nâm Yahûdi mahfil-i kazâya hâzırân olup istişhâd olunduklarında fi’l-hakīka işbu müdde‘î-i mezbûr Hürmüz târih-i kitâbdan beş ay mukaddem Şa‘bân-ı şerîf evâilinde gāib-i merkūm Dimitri v. Anton v. Yani’ye her pasdavı yüz ikişer guruşa olmak üzere beynlerinde ma‘lûm on beş pasdav çukasını bin beş yüz otuz guruşa bizim huzûrumuzda bey‘ ve teslîm ol dahi iştirâ ve kabz eyledi biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iyye eylediklerinde ba‘de ri‘âyet-i şerâiti’l-kabûl şehâdetleri makbûle olmağın mûcebince baʻde’l-hükm meblağ-ı mezbûru gāib-i merkūmun mâlından müdde‘î-i merkūma edâya vekîl-i merkūma tenbîh olunmağın mâ-vaka‘a bi’t-taleb ketb olundu. Fi’l-yevmi’s-sâlis min-Muharremi’l-harâm li-sene ihdâ ve işrîn ve miʼete ve elf. Şuhûdü’l-hâl: el-Hâc Mustafa Efendi Kethüdâ-yı hazret-i efendi, el-Hâc Mustafa Çelebi b. ( ) tâbi‘-i o, el-Hâc Hüseyin Beşe b. Abdullah, Mehmed Çelebi b. Abdullah ve gayruhum mine’l-huzzâr.