Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 120 Hüküm no: 67 Orijinal metin no: [10a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rukiye Hatun bt. Şahin Mustafa Ağa’nın babasından intikal eden eşya bedelinden azatlı kölesi Ebûbekir Ağa b. Abdullah’da olan alacak davasında sulh yoluyla anlaşarak zimmetini ibra ettiği Mahmiye-i İstanbul’da Eğrikapı dâhilinde Avcı Bey Mahallesi ahâlîsinden olup bundan akdem vilâyet-i Rumeli’nde Livadya kasabasında müsâferet vechi üzere sâkin iken vefât eden Şahin Mustafa Ağa b. Abdullah’ın verâseti hîn-i vefâtında sagīre ve hâlâ kebîre kızı Rukiye Hatun’a münhasıra olduğu şer‘an zâhir ve mütebeyyin oldukdan sonra mezbûre Rukiye Hatun tarafından husûs-ı âti’z-zikri ikrâra vekîl olduğu zât-ı mezbûreyi ma‘rifet-i şer‘iyye ile ârifân Mustafa Efendi b. Ahmed Efendi ve Ali Efendi b. Ömer nâm kimesneler şehâdetleriyle şer‘an sâbit olan Ahmed Efendi b. Mehmed meclis-i şer‘-i şerîf-i enverde işbu râfi‘u’l-kitâb Ebûbekir Ağa b. Abdullah nâm kimesne mahzarında ikrâr ve takrîr-i kelâm edip mezbûr Ebûbekir Ağa müteveffâ-i mezbûrun abd-i memlûkü olmağla hîn-i fevtinde yanında mevcûd olan eşyâsından bin guruş kıymetli ma‘lûmü’l-mikdâr eşyâ ile nakid bin guruşu ahz u kabz eyledikden sonra mecmû‘undan ancak dört yüz yetmiş guruşu müvekkile-i mezbûre hâl-i sıgārında vasîsi olan Fâtıma Hatun’un husûs-ı mezbûra vekîli olan Kadana İvaz nâm kimesneye teslîm ol dahi bi’l-vekâle kabz edip mezbûr Ebûbekir Ağa yedinde mecmû‘ iki bin guruşdan bin beş yüz otuz guruşu bâkī kalmağın müvekkilem kebîre ve reşide ve bâliğa olup mezbûr Ebûbekir Ağa babasından müntakil abd-i memlûkü olmağla mâlından tahrîr ve i‘tâk eyleyip ve mecmû‘ iki bin guruşdan vekîl-i mezbûr Kadana İvaz’ın dört yüz yetmiş guruşu kabz eylediği ma‘lûm ve makbûlü olup bâkī kalan bin beş yüz otuz guruşu hâlâ mezbûr Ebûbekir Ağa’dan taleb ve da‘vâ eyledikde beynlerinde münâza‘ât-ı kesîre cereyân etmişidi el-hâletü hâzihî mezbûr Ebûbekir Ağa müvekkilem mezbûre Rukiye Hatun ile da‘vâ-yı mezkûresinden vesâtet-i müslihîn ile yüz yetmiş guruş üzerine sulh eyledikde ol dahi sulh-ı mezbûru kabûl ve bedel-i sulh olan meblağ-ı mezbûru yedinden tamamen ahz u kabz edip mâ‘adâsına ve sâir târih-i kitâba gelince cemî‘ hukūk-ı ma‘lûme ve mechûleye müte‘allika âmme-i da‘vâdan müvekkilem mezbûre mu‘takı olan merkūm Ebûbekir Ağa’nın zimmetini ibrâ ve iskāt edip ol dahi bedel-i sulh-ı mezbûra ve sâir cemî‘ hukūka müte‘allika âmme-i da‘vâdan kezâlik müvekkilem mezbûrenin zimmetini ibrâ ve iskāt edip min-ba‘d birbirleriyle aslâ da‘vâ ve nizâ‘ları yokdur dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu Fî 12 min-şehri Rebîʻülâhir sene 1121 Şuhûdü’l-hâl: Es-sâbikūn, es-sâbikūn, es-sâbikūn