Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 119 Hüküm no: 66 Orijinal metin no: [10a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rukiye Hatun bt. Şahin Mustafa Ağa’nın kölesi Ebûbekir b. Abdullah’ı azat ettiği Mahmiye-i İstanbul’da Ali Paşa-yı Atîk Mahallesi’nde sâkine Rukiye Hatun bt. Şahin Mustafa Ağa tarafından husûs-ı âti’z-zikri ikrâra vekîl olduğu zât-ı mezbûreyi ma‘rifet-i şer‘iyye ile ârifân Mustafa Efendi b. Ahmed Efendi ve Ali Efendi b. Ömer şehâdetleriyle şer‘an sâbit olan Ahmed Efendi b. Mehmed nâm kimesne meclis-i şer‘-i şerîf-i enverde ikrâr ve takrîr-i kelâm edip müvekkilem mezbûre Rukiye Hatun’un babası olup bundan akdem vefât eden mezbûr Şahin Mustafa Ağa’nın abd-i memlûkü olup vefâtından sonra müvekkilem mezbûreye intikāl eden işbu açık kaşlı uzun boylu ak sakallı Müslimü’l-mille işbu bâ‘isü’l-vesîka Ebûbekir b. Abdullah’ı müvekkilem mezbûre Rukiye Hatun hasbeten lillâhi’l meliki’l-vehhâb ve taleben li-merzâti Rabbi’t-tevvâb mâlından tahrîr ve i‘tâk ve sâir ahrâr-ı asliyyîn zümresine idrâc ve ilhâk eyledi baʻde’l-yevm mevsûf-ı mezbûr Ebûbekir sâir ahrâr-ı asliyyîn gibi hür olup üzerinde velâ-i şer‘îden gayrı hakkı kalmamışdır dedikde mâ-vaka‘a bi’t-taleb ketb olundu. Fî 13 min-şehri Rebîʻülâhir sene 1121 Şuhûdü’l-hâl: Es-Seyyid Salih Efendi b. Mehmed, es-Seyyid Mustafa Efendi b. Abdülkerim, el-Hâc Hasan Ağa b. Osman, Abdurrahman Efendi b. Abdülbâki Efendi, Mehmed Efendi b. Hüseyin, Mehmed Çelebi b. Mehmed, Osman Çelebi b. Abdullah, el-Hâc Ali Ağa b. el-Hâc Mehmed, el-Hâc Abdullah Ağa b. Abdullah, es-Seyyid Mehmed Çelebi b. Mehmed ve gayruhum mine’l-huzzâr.