Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 122 Hüküm no: 69 Orijinal metin no: [10a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan b. Mehmed’in alacak iddiasıyla Ali Bey b. Ebunnûr’a açtığı davada Ali Bey sulh yoluyla borcunu ödediğini ispat ettiği Vilâyet-i Anadolu’da Çerkeş kazâsına tâbi‘ Çömlekçi nâm karye sükkânından olup mahmiye-i İstanbul’da müsâferet vechi üzere sâkin Hasan b. Mehmed nâm kimesne meclis-i şer‘-i şerîf-i nebevîde işbu sâhibü’l-kitâb Ali Bey b. Ebunnûr nâm kimesne mahzarında üzerine da‘vâ ve takrîr-i kelâm edip târih-i kitâbdan yedi sene mukaddem ben mezbûr [Ali] Bey’e üç sene mütevâliyeten hizmet edip zimmetinde müctemi‘ olan otuz guruş ücretimden dört guruşumu ahz u kabz ve meblağ-ı bâkī yirmi altı guruş hakkımı hâlâ mezbûr Ali Bey’den taleb ve da‘vâ eylediğimde edâdan imtinâ‘ eder suâl olunup alıverilmesi matlûbumdur dedikde [10b] gıbbe’s-suâl mezbûr Ali Bey cevâbında ber-vech-i muharrer müdde‘î-i mezbûrun hizmet ettiğini ikrâr lâkin târih-i kitâbdan iki sene mukaddem mahmiye-i mezbûrede Şehzâde Câmi‘-i şerîfi kurbünde meblağ-ı bâkī-i mezbûr yirmi altı guruşu mezbûr Hasan benden taleb ve da‘vâ eyledikde ben dahi meblağ-ı bâkī-i mezbûru tamamen edâ ve teslîm eyledim deyü def‘le mukābele edip beynimizde nizâ‘-ı küllî vukū‘undan sonra beynimize muslihûn tavassut edip da‘vâ-yı mezkûresinden mezbûr Hasan’ı benimle iki guruş üzerine sulh eylediklerinde ol dahi sulh-ı mezbûru baʻde’l-kabûl bedel-i sulh olan meblağ-ı mezbûr iki guruşu ben mezbûr Hasan’a def‘ ü teslîm ol dahi yedimden ahz u kabz edip husûs-ı mezbûra müte‘allika cemî‘ de‘âvî ve mutâlebâtdan benim zimmetimi ibrâ ve iskāt eyledi deyü def‘le mukābele edicek gıbbe’l-istintak ve akībe’l-inkâr mezbûr Ali Bey’den def‘-i mezkûrunu mübeyyine beyyine taleb olundukda kazâ-i mezbûr sükkânından ve udûl-i ricâlden olup mahmiye-i mezbûrede bi-tarîkı’l-müsâferet sâkin Hüseyin b. Yusuf ve Mehmed b. Mustafa ve diğer Hüseyin b. el-Hâc İbrahim nâm kimesneler li-ecli’ş-şehâde meclis-i şer‘a hâzirûn olup istişhâd olunduklarında fi’l-hakīka müdde‘î-i mezbûr Hasan târih-i kitâbdan iki sene mukaddem mahmiye-i mezbûrede zikri mürûr eden Şehzâde Câmi‘-i şerîfi kurbünde ücreti olan meblağ-ı bâkī-i mezbûr yirmi altı guruşu mezbûr Ali Bey’den taleb ve da‘vâ eyledikde ol dahi meblağ-ı mezbûru tamamen sana edâ ve teslîm eyledim deyü def‘e tasaddî eyledikde beynlerinde nizâ‘-ı küllî vukū‘undan sonra mezbûr Hasan meblağ-ı bâkī-i mezbûr da‘vâsından mezbûr Ali Bey ile iki guruş üzerine sulh olup ve bedel-i sulh olan meblağ-ı mezbûr iki guruşu mezbûr Ali Bey yedinden ahz u kabz edip husûs-ı mezbûra müte‘allika cemî‘ de‘âvî ve mutâlebatdan mezbûr Ali Bey’in zimmetini bizim huzûrumuzda ibrâ ve iskāt eyledi biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iyye eylediklerinde ba‘de ri‘âyeti şerâiti’l-kabûl şehâdetleri makbûle olmağın mûcebince müdde‘î-i mezbûr Hasan bî-vech mu‘ârazadan men‘ olunup mâ-hüve’l-vâki‘ bi’t-taleb ketb olundu. Fî 13 min-şehri Rebîʻülâhir sene 1121 Şuhûdü’l-hâl: Mehmed b. Hasan, Muharrem b. Sevindik, Mehmed b. Şa‘ban, Veli Bey b. Mehmed, Mehmed b. Hamza, İsa Bey b. İbrahim, Mustafa b. Şa‘ban, Ramazan b. Receb, Hasan b. Mehmed, Bayezid Bey b. Abdurrahman, Derviş Ağa b. Abdurrahim, İbrahim b. Hasan, Hüseyin Çavuş el-Mübâşir ve gayruhum mine’l-huzzâr.