Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 123 Hüküm no: 70 Orijinal metin no: [10b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hamza Odabaşı b. Ali’nin evini hanımı Ümmügülsüm bt. Hacı İbrahim’e sattığı Mahmiye-i İstanbul’da Akşemseddin Mahallesi sükkânından Hamza Odabaşı b. Ali nâm kimesne meclis-i şer‘de zevce-i menkûhası işbu râfi‘atü’l-vesîka Ümmügülsün[m] bt. el-Hâc İbrahim nâm hatun mahzarında ikrâr ve takrîr-i kelâm edip akd-i âtî sudûruna değin yedimde mülk ve hakkım olup mahalle-i mezbûrede vâki‘ bir tarafdan mahalle-i mezbûre imâmına meşrûta vakıf menzil ve bir tarafdan benim âhar mülküm ve bir tarafdan Sakacı İbrahim Çelebi ve baʻzan Çalak Ahmed Beşe ve baʻzan Medîne-i Münevvere Vakfı olan menzil ve baʻzan Şemseddinzâde mülkü ve bir tarafdan tarîk-i âm ile mahdûd dâhiliyesinde iki bâb fevkānî oda ve bir matbah ve tahtânî bir kiler ve bir kuyu ve kenîf ve hâriciyesinde bir bâb fevkānî oda ve tahtında bir ahır ve havlu ve kenîf ve bahçeyi müştemil mülk menzilimi cümle tevâbi‘ ve levâhıkı ile tarafeynden îcâb ve kabûlü hâvî bey‘-i bâtt-ı sahîh-i şer‘î ile zevcem mezbûre Ümmügülsüm Hatun’a dört yüz guruşu bey‘ ve teslîm ve temlîk ol dahi vech-i meşrûh üzere iştirâ ve temellük ve kabz ve kabûl ettiğinden sonra semeni olan meblağ-ı mezbûrdan merkūme Ümmügülsüm Hatun’un zimmetini ibrâ ve iskāt eyledim baʻde’l-yevm menzil-i mahdûd-ı mezbûr merkūme Ümmügülsüm Hatun’un mülk ve hakkı olmuşdur keyfe mâ teşâ ve tehtâr mutasarrıfe olsun dedikde gıbbe’t-tasdîkı’l-mer‘î mâ-hüve’l-vâki‘ bi’t-taleb ketb olundu. Fî 14 min-şehri Rebîʻülâhir sene 1121 Şuhûdü’l-hâl: Ebûbekir Efendi b. Receb el-İmâm, Çorbacı Mehmed Ağa b. Mustafa, el-Hâc İbrahim Ağa b. Mustafa, Sarrac Hüseyin Çelebi b. Ahmed, Hasan Efendi b. Sâdık Mehmed, Mustafa Çelebi b. Abdullah, Ali Çelebi b. İvaz, Hasan [b.] Mustafa Muhzır.