Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 126 Hüküm no: 76 Orijinal metin no: [11a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mürefte köyünden İstanbul’da misafir olarak bulunan Sâliha Hatun bt. Hüseyin Efendi’nin kocası Mahmud b. Ali’den boşanmış olduğunun tescili Vilâyet-i Rumeli’nde Gelibolu kazâsı nevâhîsinden Şehirköyü nâhiyesine tâbi‘ Mürefte nâm karye ahâlîsinden olup mahmiye-i İstanbul’da Gül Câmi‘-i şerîfi Mahallesi’nde sâkine işbu râfi‘atü’l-vesîka Sâliha bt. Hüseyin Efendi nâm hatundan vech-i âtî üzere istihbâr-ı şer‘î sudûrundan sonra karye-i mezbûre ahâlîsinden olup mahmiye-i mezbûrede Ayazmakapısı dâhilinde Bostancı Hanı’nda müsâferet vechi üzere sâkin karye-i mezbûre müezzini Abdullah Halîfe b. Mehmed ve Hoca Ahmed Halîfe b. el-Hâc Mustafa nâm kimesnelerden istihbâr ve istifsâr olundukda işbu müstahbire-i mezbûre Sâliha’yı târih-i kitâbdan sekiz ay mukkadem zevci gāib ani’l-meclis Mahmud b. Ali nâm kimesne karye-i mezbûrede bizim huzûrumuzda bâyinen tatlîk etmekle işbu müstahbire-i mezbûre zevci gāib-i mezbûrdan mutallaka olmuşdur biz bu husûsa bu vech üzere şâhidleriz şehâdet dahi ederiz deyü her biri alâ-tarîkı’ş-şehâde haber vermeleriyle mâ-vaka‘a hıfzan li’l-makāl bi’t-taleb ketb olundu. Fî 15 min-şehri Rebîʻülâhir sene 1121 Şuhûdü’l-hâl: Müezzin Hasan Efendi b. Ali, İmâm es-Seyyid Mehmed Efendi b. Abdülfettâh, Ahmed Çelebi b. Mustafa, Mehmed Çelebi b. Receb. Ömer Çelebi b. Ramazan, Ali Çelebi b. el-Hâc Mustafa, Hasan Beşe b. Kalender, es-Seyyid Ahmed b. Mustafa ve gayruhum mine’l-huzzâr.