Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 126 Hüküm no: 75 Orijinal metin no: [11a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefât eden Sivaster v. Kattata’nın vârislerinden Sagandu mirasa ait hissesini sulh yoluyla Sivaster’in kızı Fruşine’den teslim aldığı Mahmiye-i İstanbul’da Abdi Subaşı Mahallesi’nde sâkin iken bundan akdem hâlik olan Sivaster v. Kattata nâm zimmînin verâseti sulbiye kebîre kızı Fruşine ile li-ebeveyn karındaşı Sagandu’ya münhasıra olduğu şer‘an zâhir ve müte‘ayyin oldukdan sonra mezbûr Sagandu meclis-i şer‘-i şerîf-i enverde mezbûre Fruşine tarafından husûs-ı âti’z-zikri tasdîka vekîl olduğu İstimati v. Panayot ve Yani v. Hristodoli nâm zimmîler şehâdetleriyle sâbit olan Mosiko v. Dimitri nâm zimmî muvâcehesinde ikrâr ve takrîr-i kelâm edip hâlik-i mezbûrun mahalle-i mezbûrede vâki‘ menzil ve Tahirli’de vâki‘ menzil ve bağ ve iki bahçe ve sâir menkūl bi’l-cümle terekesinden hisse-i irsiyyemi taleb ve da‘vâ eylediğimde beynimizde ba‘de’n-nizâ‘ müvekkile-i mezbûre Fruşine vesâtet-i muslihîn ile da‘vâ-yı mezbûremden beni şerâit-i sahîha-i sulhü hâvî mevâni‘-i müfsideden ârî tehârüc-i şer‘î tarîkı üzere nukūd-ı terekeden isâbet eden hissemden ezyed iki yüz sekiz guruş üzerine sulh eyledikde ben dahi sulh-ı mezbûru kabûl ve bedel-i sulh olan meblağ-ı mezbûr iki yüz sekiz guruşu yedinden tamamen ahz u kabz edip hâlik-i mezbûrun terekesine müte‘allika âmme-i da‘vâdan müvekkile-i mezbûrenin zimmetini ibrâ ve iskāt eyledim min-ba‘d husûs-ı mîrâsa müte‘allika müvekkile-i mezbûre ile aslâ da‘vâ ve nizâ‘ım yokdur dedikde gıbbe’t-tasdîkı’l-mer‘î mâ-vaka‘a bi’t-taleb ketb olundu. Fî 13 min-şehri Rebîʻülâhir sene 1121 Şuhûdü’l-hâl: Hasan Beşe b. Abdullah, Hasan b. Mustafa, Mahmud b. Mehmed, İbrahim Efendi b. Mehmed, Mehmed Halîfe b. İbrahim, Mustafa Çelebi b. İbrahim, Mehmed Çelebi b. Osman, Mustafa Çelebi b. Şa‘ban ve gayruhum mine’l-huzzâr.