Adalar Mahkemesi 1 Numaralı Sicil (H. 1178-1184 / M. 1764-1771) cilt: 75, sayfa: 56 Hüküm no: 43 Orijinal metin no: [9a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İmam Abdülfettah Efendi’nin bağını Kostandi’ye sattığı Medîne-i Üsküdar’a muzâfe Adalar nâhiyesine tâbi‘ Dolayoba karyesinde sâkin İmam Abdülfettah Efendi b. el-İmam Veliyüddin Efendi meclis-i şer‘-i hatîrde işbu râfi‘ü’r-rakīm Moralı Kostandi v. Yorgo zimmî muvâcehesinde bi-tav‘ihi ikrâr-ı tâm ve takrîr-i kelâm edüp akd-i âti’z-zikrin sudûruna değin yedimde mülküm olup toprağında vâki‘ bir tarafı el-Hâc Halil Efendi bostanı ve iki tarafı el-Hâc Ömer oğlu Derviş Ali Bostanı ve bir tarafı tarîk-i cadde ile mahdûd tahmînen beş dönüm kürûmî mülk vişne eşcârlı ve su yollu dut ve çavuş bağımı tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile müşterî-i merkūm Kostandi zimmîye iki yüz guruşa bey‘ u teslîm ve temlîk eylediğimde ol dahi ber-vech-i muharrer iştirâ ve tesellüm ve temellük ve kabz u kabûl eyledikden sonra semeni olan meblağ-ı mezkûr iki yüz guruşu müşterî-i mesfûr Kostandi yedinden bi’t-tamâm ve’l-kemâl ahz ü kabz eyledim fîmâ-ba‘d bağ-ı mahdûd-ı mezkûrda vechen mine’l-vücûh ve sebeben mine’l-esbâb kat‘â ve kātıbeten benim alâka ve medhalim kalmayup müşterî-i merkūm Kostandi zimmînin mülk-i müşterâsı ve hakk-ı sırf-ı sahîhi olmuşdur keyfe mâ yeşâ ve yehtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Tahrîren fi’l-yevmi’t-tâsi‘ aşer min-şehri Rebî‘i’l-âhir li-sene seb‘a ve seb‘în ve mi’ete ve elf. Şuhûdü’l-hâl: Kayseriyeli Mehmed Ağa, Halil Beşe b. Ahmed, el-Hâc Süleyman b. Ahmed, Nalband Halil b. Mehmed, el-Hâc Ahmed oğlu Mehmed Beşe, Pazarköylü İbrahim Beşe, Ahmed Efendi b. Hüseyin, Arnavud Ali Beşe b. Receb, Derviş Ali b. el-Hâc Mehmed. Temme’l-kelâm fî hâze’l-makām nemekahu’l-fakīr ileyhi azze şânuhu İsmail el-müvellâ-hilâfeten bi-nâhiyeti Adalar -ufiye anhü-. [Mühür]