Üsküdar Mahkemesi 1 Numaralı Sicil (H.919-927 / M. 1513-1521) cilt: 1, sayfa: 292 Hüküm no: 473 Orijinal metin no: [79b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hüseyin b. Abdullah’ın vasiyyetinin yerine getirilmesine dair hüküm. Nişân-ı hümâyûn ve misâl-i meymûn enfez’allâhü te‘âlâ ilâ yevmî yüb‘asûn hükmü oldur ki silahdârlar zümresinden merhûm silahdâr Hüseyin v. Abdullah nâm kimesne maraz-ı mevtinde iken cümle malının sülüsün vasiyyet edip ve sülüs-i mezbûrdan beş yüz akçeyi iskāt-ı salâtı ve savmı için ve bin beş yüz akçeyi mevti gününde fukarâya sarf olunmak için ta‘yîn edip bâkī ne kalırsa vech-i meşrûh üzere istiğlâl olunup ne hâsıl olursa Anadolu’da Gekvize kazâsında olan merhûm İbrahim Ağa zâviyesinde vefâ ettiği mikdârda tilâvet oluna deyu şart ettiği mahrûse-i Edirne’ye hâliyâ kadı olan a‘del-i kuzâtü’l-müslimîn efdal-i vülâtü’l-muvahhidîn Mevlânâ Muslihiddin -zîde fezâilühû- hücceti ile ma‘lûm olup ve mezbûr müteveffânın vâris[i] olan Ali dahi husûs-ı mezbûru kapımda kabûl eylediği ecilden sadaka edip bu hükm-i şerîfi şimdi zâviyede şart-ı vâkıf üzere mütevellî olan Mustafa’nın eline verdim ve buyurdum ki ba‘de’l-yevm ol hüccet ile amel olunup bâkī kalan sülüsün alıp zabt edip vech-i meşrûh üzere istiğlâl olunup mahsûlünden yevmî birer akçe hesâbı üzere ne mikdâr cüz’e müsâ‘ade ederse ol mikdâr cüz’ tilâvet olunup sevâbın zikr olan Musa’nın rûhuna ihdâ edeler şöyle bileler alâmet-i şerîfe i‘timâd edeler. Tahrîren fî evâhiri Ramazani’l-mübârek sene seb‘a aşer ve tis‘a mi’e. Be-makâm-ı Kostantiniyye Sûret-i hükm-i Pâdişâhî budur ki sebt olundu.